ލަންކާގެ އައު ރައީސް އަނުރާ ކުމާރާ ދިސަނާޔަކޭ އެ ގައުމުގެ ގާނޫނު ހަދާ މަޖިލިސް އުވާލައްވައިފިއެވެ. މިކަން އެ ގައުމުގެ ސަރުކާރުގެ ގެޒެޓުގައި އިއުލާނު ކުރައްވާފައިވަނީ އަންގާރަ ދުވަހުއެވެ.
މީޑިއާ ރިޕޯޓްތައް ބުނާ ގޮތުން ރައީސް ދިސަނާޔަކޭ މަޖިލިސް އުވާލެއްވީ އަވަސް އިންތިޚާބަކަށް މަގުފަހިކުރެއްވުމަށެވެ. މި ގޮތުން އާ ޕާލަމެންޓަރީ އިންތިޚާބު ބޭއްވުމަށް ހަމަޖެހިފައިވަނީ ނޮވެމްބަރު 14 ވަނަ ދުވަހުއެވެ. އަދި އާ މަޖިލިސް ފެށޭނީ ނޮވެމްބަރު 21 ވަނަ ދުވަހުއެވެ.
ލަންކާގެ އެންމެ ފަހުގެ އާންމު އިންތިޚާބު ބޭއްވުނީ 2020 ވަނަ އަހަރުގެ އޯގަސްޓު މަހުގައެވެ. ގާނޫނުގައިވާ ގޮތުން މެންބަރުން އިންތިޚާބު ކުރެވެނީ 5 އަހަރުގެ ދައުރަުރަކަށެވެ.
މާކްސިސްޓު ވިސްނުމުގެ ސިޔާސީ ލީޑަރެއް ކަމަށްވާ ދިސަނާޔަކޭ ރައީސްކަމަށް އިންތިޚާބު ކުރެވުނީ މިދިޔަ ހޮނިހިރު ދުވަހު ބޭއްވުނު އިންތިޚާބުގައެވެ.
އޭނާގެ ކޯލިޝަން ކަމަށްވާ ނެޝަނަލް ޕީޕަލްސް ޕާޓީއަށް މިހާރުގެ މަޖިލީހުގައި ލިބިފައިވަނީ 225 ގޮނޑީގެ ތެރެއިން އެންމެ 3 ގޮނޑިއެވެ. އެހެންކަމުން އޭނާގެ ސިޔާސަތުތަކަށް މަޖިލީހުގެ ތާއީދު ހޯދުމަށްޓަކައި އާ އިންތިޚާބަކަށް ދިއުމަށް ނިންމެވި ކަމަށް ބެލެވެއެވެ.
ލަންކާއަކީ މިވަގުތު ބޮޑު މާލީ ހީނަރުކަމަކުން އަރައިގަތުމަށް މަސައްކަތް ކުރަމުންދާ ގައުމެކެވެ. އާ ރައީސްގެ މައިގަނޑު އެއް ޒިންމާއަކަށް ވާނީ މި ހާލަތުން އަރައިގަތުމަށް ބޭނުންވާ އިސްލާހުތައް ގެނައުމެވެ.
Advertisement
This content is created and paid for by advertisers and does not involve Voice Journalists
