ހުޅުމާލޭގެ މަގުތަކުގައި މިހާރު ހަދަމުން އަންނަ ރައުންޑްއެބައުޓްސްތަކުގައި ބަހައްޓާނެ މޮނިއުމެންޓްސް ޑިޒައިން ކުރުމުގެ މުބާރާތެއް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ފަށައިފިއެވެ.

އެޗްޑީސީ އިން ކުރި އިއުލާނެއްގައި ބުނީ، ހުޅުމާލޭގެ ބޮޑެތި މަގުތަކުގައި ހަދަމުން އަންނަ ރައުންޑްއެބައުޓްސްތަކުގައި ބަހައްޓާ މި ލޭންޑްސްކޭޕް ބަދަލުކޮށްލާނެ މި މޮނިއުމެންޓްތައް ޑިޒައިންކުރަން ޖެހޭނީ "ދިވެހީންގެ ރާއްޖެ" ރަމްޒުވާނެ ގޮތަށް ކަމަށެވެ.

މި މުބާރާތުގައި ބައިވެރިވުމުގެ ފުރުސަތު އާޓިސްޓުންނާއި ޑިޒައިނަރުން އަދި އާކިޓެކްޓްސްއަށް އެޗްޑީސީން ހުޅުވާލާފައިވާއިރު، އެންމެ ފުރިހަމަ ޑިޒައިންތައް ހުށަހަޅާ މީހަކަށް 100،000ރ. ގެ ފައިސާގެ އިނާމެއް ލިބޭނެ ކަމަށް އެ ކޯޕަރޭޝަނުން މައުލޫމާތުދެއެވެ.

މޮނިއުމެންޓް ޑިޒައިން ކުރާއިރު:

1) ޖުމްލަ 17 މޮނިއުމެންޓް ޑިޒައިންކުރާނެ ކޮންސެޕްޓް ވަކިވަކިން ހުށަހަޅަން ޖެހޭނެ.

2) މޮނިއުމެންޓް ޑިޒައިންކުރަން ޖެހޭނީ ޓްރެފިކަށް އެއްވެސް ކަހަލަ ހުރަހެއް ނޭޅޭނެހެން، ރޯޑް ސޭފްޓީގެ ގަވާއިދުތަކަށް ފެތޭނެ ގޮތަށް 

3) ޑިޒައިންކުރަން ޖެހޭނީ މެއިންޓެނަންސްގެ ހަރަދު ކުޑަވާނެ ގޮތަށް

4) ފެން ނުވަތަ ކަރަންޓު ބޭންނުންކުރަން ނުޖެހޭ ގޮތަށް

5) ކޮންމެ މޮނިއުމެންޓަކުން ވެސް ދިވެހިންގެ އުސޫލުތަކާއި ގައުމިއްޔަތާއި ސަގާފަތާއި ތަރިކަ އަދި ތާރީހު ރަމްޒުކޮށްދޭން ޖެހޭނެ

އެޗްޑީސީން ފާހަގަކުރި ގޮތުގައި މުބާރާތުގައި ބައިވެރިވެވޭނީ  ޕްރޮފެޝަނަލް އާޓިސްޓުންނާއި ޑިޒައިނަރުންނާއި އާކިޓެކްޓްސް އަދި ގުޅޭ ދާއިރާއަކުން ކިޔަވާ ދަރިވަރުންނަށެވެ. އުމުރުން 18 އަހަރު ފުރުމާއިއެކު، ފަސް މީހުންގެ ޓީމަކުން ގުޅިގެން ވެސް ޑިޒައިންތައް ހުށަހެޅޭނެ ކަމަށް ވެސް އެ ކޯޕަރޭޝަނުން ބުނެއެވެ.

މި މުބާރާތައް ޑިޒައިންތައް ހުށަހެޅުމުގެ ފުރުސަތު އަންނަ މަހު 30 ގެ ނިޔަލަށް ހުޅުވާލައިފަިވާއިރު، މުބާރާތުން މޮޅުވާ މީހެއް އެޗްޑީސީން އިއުލާންކުރާނީ އަންނަ ނޮވެމްބަރު މަހު 14 ގަ އެވެ.