ހައްދުފަހަނަ އަޅާފައިވާ ޔަހޫދީން ޣައްޒާގައި ހިންގަމުންދާ ގަތުލުއާއްމުގައި ޝަހީދުކޮށްލި 88 މީހެއްގެ ހަށިގަނޑު ކޮންޓެއިނަރެއްގައި ޣައްޒާގެ ހެލްތު މިނިސްޓްރީ އާއި ހަވާލުކުރަން މަސައްކަތްކޮށްފިއެވެ.

މި ހަށިތައް ޔަހޫދީން ޣައްޒާއަށް އެތެރެކޮށްފައިވަނީ އެމީހުންގެ ގަދަކަމުން ހިފާފައިވާ ބޯޑަރެއް މެދުވެރިކޮށެވެ. 

ޣައްޒާގެ ކަމާ ބެހޭ ފަރާތްތަކުން ބުނީ މި ހަށިތައް ޣައްޒާއަށް އެތެރެކުރުމުގެ ކުރިން އެއީ ކޮން ބައެއް ކަމާއި، އެމީހުންނާއި ގުޅޭ އެއްވެސް މައުލޫމާތެއް ޔަހޫދީން ދީފައިނުވާ ކަމަށެވެ.

Advertisement

މިކަމާއި ގުޅިގެން ޣައްޒާގެ ހެލްތު މިނިސްޓްރީން ނެރުނު ބަޔާނެއްގައި ބުނީ، އެ ހަށިތަކުގެ ފުރިހަމަ މަޢުލޫމާތު ލިބި، އެ މީހުންގެ ގާތްތިމާގެ މީހުންނަށް އެ މީހުން ދެނެގަނެވެންދެން ޝަހީދުވެފައިވާ ހަށިތައް ހުރި ކޮންޓެއިނަރު ބަލައިނުގަތުމަށް ނިންމާފައިވާ ކަމަށެވެ.

މިގޮތުން، އެ މިނިސްޓްރީގެ ޑައިރެކްޓަރ އިސްމާޢީލް އަލް-ޘަވާބިތާ ވިދާޅުވީ، ޔަހޫދީން އަމަލު ކުރަން ޖެހޭނީ ޝަހީދުންގެ ހަށިތަކާއި, ޝަހީދު ކޮށްލާފައިވާ މީހުންގެ ޢާއިލާތަކުގެ ކަރާމަތަށް ގެއްލުމެއް ނުވާނެ ގޮތަށް, އިންސާނިއްޔަތާ ބެހޭ ބައިނަލްއަޤުވާމީ ޤާނޫނުތަކާ އެއް ގޮތަށްކަމަށެވެ.

އެއީ ކޮންބައެއް ކަމަށާއި، ޝަހީދު ކޮށްލާފައި ވަނީ ކޮން އިރަކު, އަދި ކޮން ތަނަކު ކަން ޔަހޫދީން ހާމަކުރަންދެން، އެ ހަށިތައް ބަލައިގަތުމާއި ވަޅުލުމަށް އިންކާރުކޮށް، އިންޓަރނޭޝަނަލް ކޮމިޓީ އޮފް ދަ ރެޑް ކްރޮސް (އައިސީއާރުސީ) އިން އިސްރާއީލުގެ ފަރާތުން މި ހަށިތަކާއި ގުޅޭ އިތުރު މަޢުލޫމާތު ހޯދުމަށް މިނިސްޓްރީން ވަނީ ގޮވާލާފައެވެ.

މިއާއިއެކު، އައިސީއާރުސީ އިން ނެރުނު ބަޔާނެއްގައި ބުނީ، މިކަމުގައި އެމީހުންގެ އެއްވެސް ބައިވެރިވުމެއް ނެތް ކަމަށާއި، "ޝަހީދު ކޮށްލާފައިވާ ކޮންމެ މީހެއްގެ މަޢުލޫމާތު, އެ މީހެއްގެ ޢާއިލާއާ ޙިއްޞާ ކުރަން ޖެހޭނެ ކަމަށާއި, ޝަހީދު ކޮށްލާފައިވާ މީހުންގެ ހަށިތައް އެ ބަޔެއްގެ އާދަކާދަތަކާ އެއް ގޮތަށް ވަޅުލުމުގެ ފުރުޞަތު ދޭން ޖެހޭނެ ކަން ތަކުރާރުކޮށް ހަނދާންކޮށްދޭ ކަމަށެވެ.

ބައިނަލްއަޤްވާމީ އިންސާނީ ޤާނޫނުގެ ދަށުން، ހަނގުރާމައިގެ ތެރޭގައި މަރުވެފައިވާ މީހުންނާމެދު ޢަމަލުކުރަންވާނީ އިންސާނީ ކަރާމާތާއި އިހުތިރާމް ނުގެއްލޭ ފަދައިންނެވެ. ޤާނޫނުގައި ބުނާ ގޮތުން، އެމީހުންގެ ހަށިތައް ހޯދައި، ވަޅުލުމަށް ފުރުޞަތު ދިނުމުގެ ގޮތުން އެ ހަށިތައް ރައްކާ ކުރަން ޖެހޭނެއެވެ.

އެހެންނަމަވެސް، ބައިނަލްއަގުވާމީ އެތައް ގާނޫނުތަކާއި އެންގުންތަކަށް ބީރު ކަންފަތެއް ދެމުންގެންދާ ޔަހޫދީން މިވަނީ މި ޤާނޫނާއި ވެސް ޚިލާފުވެފައެވެ.