އދ ގެ އާއްމު މަޖިލީހުގައި މިއަދު އިޒްރާއީލްގެ ބޮޑުވަޒީރު، ބެންޖަމިން ނަތަންޔާހޫ ތަގްރީރުކުރަން ފެށުމާއެކު ރާއްޖޭގެ ވަފުދުން މަޖިލީހުގެ މާލަމުން ނިކުމެއްޖެއެވެ.
އެމެރިކާގެ ނިއުޔޯކްގައި މިހާރު ކުރިއަށްދާ އދ ގެ އާއްމު މަޖިލީހުގައި މިއަދު އިޒްރާއީލްގެ ބޮޑުވަޒީރު، ބެންޖަމިން ނަތަންޔާހޫ ތަގްރީރުކުރަން ފެށުމާއެކު ފަލަސްތީނަށް ތާއީދުކުރާ ޤައުމުތަކުން ވަނީ މަޖިލިސް ބޮއިކޮޓްކުރުމަށްފަހު މާލަމުން ނިކުމެފައެވެ.
މިކަމާ ގުޅޭގޮތުން ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، އިސްރާއީލްގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ އދ.ގެ އާންމެ މަޖިލީހުގައި ތަޤްރީރު ކުރަން ފެށުމުން އެހޯލުގައިތިބި ރާއްޖޭގެ ވަފްދު އެތަނުން ނިކުމެފައިވާކަމަށެވެ.
ރާއްޖޭގެ ވަފްދު އެހޯލުން ނުކުތީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަލަޞްޠީނާމެދު ގެންގުޅުއްވާ ޚާއްސަ ކަމާއި، ފަލަސްޠީނުގެ ޙައްޤުގައި އެމަނިކުފާނު ކުރައްވަމުން ގެންދަވާ ޚާއްޞަ މަސައްކަތްޕުޅަށް އިޙްތިރާމް ކުރެއްވުމުގެ ގޮތުންކަމަށް ހީނާ ވިދާޅުވިއެވެ. އދ ގެ މަޖިލީހުގައި ބައިވެރިވެ ވަޑައިގަތުމަށް އެމެރިކާއަށް ކުރައްވަމުންގެންދަވާ ދަތުރުފުޅުގައި ރައީސް ޑރ.މުއިއްޒު ވަނީ ފަލަސްތީނުގެ ރައީސް މަޙްމޫދު ޢައްބާސްއާ ބައްދަލުކުރައްވާފައެވެ. މި ބައްދަލުކުރެއްވުމުގައި ރައީސް މުއިއްޒު ވަނީ، ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަޤްވާމީ ގޮތުން ކުރެވޭ މަސައްކަތްތަކުގައި ދިވެހިރާއްޖެއިން ސާބިތުކަމާއެކު ދެމި އޮންނާނެކަމުގެ ކަށަވަރުކަން ދެއްވާފައެވެ.
އަންގާރަދުވަހު ބޭއްވި މި ބައްދަލުވުމުގައި ރައީސް ޑރ. މުޢިއްޒު ވަނީ ފަލަސްތީނަށް ދިވެހިރާއްޖެއިން ކުރެވެންހުރި ހުރިހާ ގޮތަކުން އެހީތެރިވެދޭނެކަން ކަށަވަރުކޮށްދެއްވާފައެވެ. ހަމަ އެހެންމެ، ދެ ޤައުމުގެ ދެމެދުގައި އެއްބާރުލުން ދެވިދާނެ ދާއިރާތަކާ ބެހޭގޮތުންވެސް ދެ ރައީސުން ވަނީ މަޝްވަރާކުރައްވާފައެވެ.
އދ.ގެ ޢާންމު މަޖިލީހުގެ 79 ވަނަ އާއްމު މަޖިލީހުގައި ތަގުރީރުކުރައްވަމުން ރައީސް ޑރ.މުއިއްޒު ވަނީ ފަލަސްތީނު ރައްޔިތުންނާ ދެކޮޅަށް އިޒްރާއީލުން ހިންގަމުންގެންދަނީ، ނިރުބަވެރި އަމަލުތަކެއް ކަމަށާއި، ބައިނަލްއަޤްވާމީ މުޖުތަމައުއިން އިޒްރާއީލް ޖަވާބުދާރީ ކުރުވަން ޖެހޭކަމަށް ވިދާޅުވެފައެވެ.
އެ ބައްދަލުވުމުގައި ރައީސް ވިދާޅުވީ އިޒްރާއީލުން ފަލަސްތީނުގެ ސްކޫލްތަކާއި، ހޮސްޕިޓަލްތަކާއި އަދި އިންސާނީ އެހީދޭ ވަސީލަތްތަކަށް ހަމަލާދިނުމާއި އަދި ކުށެއްނެތް ފަލަސްތީނުގެ އަންހެނުންނާއި، ފިރިހެނުންގެ އިތުރުން ކުޑަކުދިންނަށް އަމާޒުކޮށް ހިންގަމުންދާ ނިރުބަވެރި އެ އަމަލުތަކަށް އިޒްރާއީލް ޖަވާބުދާރީ ކުރުވަން ޖެހޭކަމަށެވެ.
Advertisement
This content is created and paid for by advertisers and does not involve Voice Journalists
