ޕަބްލިކް ސާވިސް މީޑިއާ (ޕީއެސްއެމް) އަށް ޑޮލަރުގަތުމަށް ނެގި ފައިސާ އާއި، އާމްދަނީގެ ގޮތުގައި ލިބިފައިހުރި ފައިސާގެ ތެރެއިން 9 މިލިއަނަށްވުރެ ގިނަ ރުފިޔާ ވީއެއްނުވީއެއް ނޭނގި ގެއްލުނު މައްސަލަ، ފުލުހުން އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.

ފުލުހުން މީޑިއާތަކަށް ފޮނުވި މެސެޖެއްގައި ވިދާޅުވީ ކޮރަޕްޝަންގެ މައްސަލަތައް ތަހުގީގު ކުރުމުގެ އިހުތިސާސް އޮންނަނީ އޭސީސީގައި ކަމަށްވާތީ، އެ މައްސަލަ ފުލުހުން އޭސީސީ އަށް ފޮނުވާފައި ކަމަށެވެ. 

މި މައްސަލައާއި ގުޅިގެން ޕީއެސްއެމްގެ ހާއްސަ އޮޑިޓެއް، އޮޑިޓަރ ޖެނެރަލް އޮފީހުންވެސް ހަދާފައިވާއިރު، ޕީއެސްއެމަށް ޑޮލަރު ގަތުމަށް އަމިއްލަ ފަރާތްތަކަށް އެކިފަހަރުމަތިން ގިނަ އަދަދެއްގެ ފައިސާ ދިނުމަށްފަހު އޭގެ ތެރެއިން ބައެއް ފައިސާއަށްވާ ޑޮލަރު ލިބިފައި ނުވާކަން އެ އޮޑިޓުން ވަނީ ހާމަވެފައެވެ.

މީގެ އިތުރުންވެސް،  އޮޑިޓްގައި އުސޫލާ ހިލާފަށް މާލިއްޔަތު ގަވައިދާ ހިލާފަށް ގިނަ ކަންތައްތަކެއް ހިނގާފައިވާކަން އޮޑިޓަރ ޖެނެރަލްގެ ރިޕޯޓްގައި ވަނީ ފާހަގަަަކޮށްފައެވެ.

މިގޮތުން:

1) ޑޮލަރުގަތުމަށް ވޭތުވެދިޔަ ހަތަރު އަހަރުދުވަހުގެ ތެރޭގައި އެކި ފަހަރުމަތިން ޖުމްލަ 373،988 ޑޮލަރަށްވާ 5،785،346 ރުފިޔާ ޕީއެސްއެމްގެ އެކައުންޓުން އެކިފަހަރުމަތިން ނަގާފައިވޭ

2) އޭގެ ތެރެއިން 4،583،701 ރުފިޔާއަށްވާ 297،257 ޑޮލަރު ޕީއެސްއެމަށް ލިބިފައެއްނުވޭ

3) އޮންލައިން ޓްރާންސްފަރ ހަދައިގެން 1،284،479 ރުފިޔާ ޑޮލަރުގަތުމަށް ނަގާފައިވާއިރު، ޖުމްލަ 75،491 ޑޮލަރަށްވާ 1،164،068 މިލިއަން ރުފިޔާ އެކިފަހަރުމަތިން ޖަމާކޮށްފައިވަނީ ޕީއެސްއެމްގެ ކުރީގެ ފައިނޭންސް ޑިރެކްޓަރުގެ ދަރިއެއްގެ ބޭންކް އެކައުންޓަށް

4)  އޮންލައިން ޓްރާންސްފަރ ހެދުމަށް ބައެއް ޕޭމަންޓް ވައުޗަރުތަކުގައި ސޮއިކޮށްފައިވަނީ ހަމައެކަނި އޭރުގެ ފައިނޭންސް ޑިރެކްޓަރު އެކަނި

5) ރާއްޖެއިން ބޭރުގެ ކުންފުންޏެއްގެ ބިލްތަކަށް ފައިސާ ދެއްކުމަށް ބޭނުންވާ ޑޮލަރުގަތުމަށް އެއްފަހަރަށްވުރެ ގިނަ ފަހަރަށް އެއް ބިލްތަކެއް ބޭނުންކޮށްފައިވޭ

6) ޑޮލަރު ގަތުމަށް ނެގި ފައިސާއަށް ލިބުނު ބައެއް ޑޮލަރުތައް މުއާމަލާތްކުރުމުގައި ކުރީގެ ފައިނޭންސް ޑިރެކްޓަރާއި އޭނާގެ ދަރީގެ އެކައުންޓްތައް އުސޫލާ ހިލާފަށް ބޭނުންކޮށްފައިވޭ

އޮޑިޓަރ ޖެނެރަލް ގެ ރިޕޯޓްގައިވާ ގޮތުން، 2017 ވަނަ އަހަރުން ފެށިގެން 2024 ވަނަ އަހަރަށް ޕީއެސްއެމަށް ލިބުނު އާމްދަނީގެ ގޮތުގައި ލިބުނު ނަގުދު ފައިސާގެ ތެރެއިން 4.2 މިލިއަނަށްވުރެ ގިނަ ރުފިޔާ އެކުންފުނީގެ ބޭނުމަށް ބޭނުންނުކޮށް އަދި ކުންފުނީގެ ތިޖޫރިއަށްވެސް ނުވައްދައި އެ ފައިސާގެ ތެރެއިން 4.1 މިލިއަން ރުފިޔާ އާ އެންމެފަހުން ހަވާލުވެފައިވަނީ ކުރީގެ ފައިނޭންސް ޑިރެކްޓަރެވެ.

މިގޮތުން ޕީއެސްއެމް ތިޖޫރީގައި ހުންނަންޖެހޭ 190،087 ރުފިޔާ ބޭންކް އެކައުންޓަށް ޖަމާކުރުމަށް ކުރީގެ ފިނޭންސް ޑިރެކްޓަރު ހަވާލުވުމަށްފަހު، އެފައިސާ ޕީއެސްއެމް އެކައުންޓަށް ނުވަދެ ގެއްލިފައިވާކަން ފާހަގަކުރުމުގެ އިތުރުން، ޕީއެސްއެމަށް ޑޮލަރުގަތުމަށް ނެގި ފައިސާ އާއި، އާމްދަނީގެ ގޮތުގައި ލިބިފައިހުރި ފައިސާގެ ހިޔާނާތާ ގުޅޭ އެތައް މައްސަލަތަކެއް މި ރިޕޯޓްގައިވަނީ ފާހަގަކޮށްފައެވެ.