ފަލަސްޠީނުގައި މިނިވަން ދައުލަތެއް ޤާއިމުކުރުމަށް ބާރުއަޅާނެ އިއްތިހާދެއް ސަޢޫދީ ޢަރަބިއްޔާއިން އެކުލަވައިލައިފިއެވެ.
ސަޢޫދީ ޢަރަބިއްޔާގެ ޚާރިޖީ ވަޒީރު ފައިޞަލް ބިން ފަރްޙާން އަލް-ސުޢޫދު މިކަން ހާމަކޮށްފައިވަނީ، އެމެރިކާގެ ނިއުޔޯކްގައި ކުރިއަށްދާ އދގެ ޢާންމު މަޖިލީހުގެ 79ވަނަ ޢާންމު ޖަލްސާގެ ހަވާސާގައެވެ.
މި އިއްތިހާދުގައި އެތައް ޢަރަބި އަދި މުސްލިމު ޤައުމުތަކަކާއި ޔޫރަޕުގެ ބައިވެރިންތަކެއް ހިމެނޭކަމަށް ސަޢޫދީ ސަރުކާރުގެ ނޫސް އޭޖެންސީއިން ރިޕޯޓުކޮށްފައިވީ ނަމަވެސް، ކޮން ޤައުމުތަކެއްކަން ބަޔާންކޮށްފައެއް ނުވެއެވެ.
މިކަމާއި ގުޅިގެން ޔޫރަޕިއަން ޔޫނިއަންގެ ޚާރިޖީ ސިޔާސަތުގެ އިސްވެރިޔާ ޖޮސެޕް ބޮރެލް ވިދާޅުވެފައިވަނީ، ފުރަތަމަ ބައްދަލުވުންތައް ރިޔާދު އަދި ބްރަސެލްސްގައި ބޭއްވޭނެ ކަމަށެވެ.
ފާއިތުވި އޮކްޓޯބަރު މަހު އިސްރާއީލުން ޣައްޒާއަށް ދޭން ފެށި ލާއިންސާނީ ހަމަލާތަކާއި ގުޅިގެން ސަޢޫދީ ޢަރަބިއްޔާއިން ވަނީ އިސްރާއީލާއިއެކު ސިޔާސީ ގުޅުން ޤާއިމު ކުރުމާ ގުޅޭ ގޮތުން ކުރަމުން ދިޔަ މަޝްވަރާތައް މެދުކަނޑާލާފައެވެ.
މިގޮތުން، ސަޢޫދީ ޢަރަބިއްޔާގެ ވަލީއަޙުދު މުޙައްމަދު ބިން ސަލްމާން ވަނީ ފަލަސްތީނުގެ މިނިވަން ދައުލަތެއް ނެތި އެ ޤައުމުން އިސްރާއީލު ބަލައިނުގަންނާނެ ކަމަށާއި، ފަލަސްތީނު ރައްޔިތުންނާ ދެކޮޅަށް ހިންގާ ޖަރީމާތައް ވަރަށް ހަރުކަށި އިބާރާތުން ކުށްވެރިކުރައްވާ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
