ޤަވަައިދާ ހިލާފަށް އުޅެމުންދާ ބިދޭސީން ހޯދުމަށް އިމިގްރޭޝަނުން ފަށާފައިވާ ބަލާފާސްކުރުމުގެ ދެވަނަ ބުރު މިއަދު ހުޅުމާލޭގައި ފަށައިފިއެވެ. 

މިކަމާ ގުޅޭގޮތުން މޯލްޑިވްސް އިމިގްރޭޝަނުން ބުނީ، ސިލްސިލާކޮށް ކުރިއަށް ގެންދިއުމަށް ރާވާފައިވާ، މާސް އިންސްޕެކްޝަންގެ ދެވަނަ އިންސްޕެކްޝަން މއަދު ހުޅުމާލޭގައި ފަށައިގެން ކުރިއަށްދާކަމަށެވެ.

މި އިނިސްޕެކްޝަނުގެ ދަށުން ޤަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުންދާ ބިދޭސީން ބަލާފާސްކުރުމަށް ހަމަޖެހިފައިވާކަމަށް އިމިގްރޭޝަނުން ބުންޏެވެ. މި އިންސްޕެކްޝަންގައި ހުޅުމާލޭގެ ފޭސް 01 އަދި 02 ހިމެނޭހެން 27 ޒޯނެއް ބަލައި ފާސްކުރުމަށް ވަނީ ހަމަޖެހިފައެވެ. 

އިމިގްރޭޝަނުން ބުނީ، މި ހަރަކާތުގެ މަޤްސަދަކީ ދީފައިވާ ހުއްދައިގެ ބޭރުން ރާއްޖޭގައި އުޅެމުން އަންނަ ބިދޭސީންނާއި ގަވާއިދާ ހިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަތުންކަމަށެވެ. އަދި އެފަދަ ފަރާތްތައް އިމިގްރޭޝަނަށް ހާޒިރުވުމަށް އަންގައި، އަދި މިފަދަ ބިދޭސީން ލައްވައި މަސައްކަތްކުރުވާ ދިވެހިންނަށް ލިޔުމުން ނަސޭހަތްދިނުން ހިމެނޭކަމަށްވެސް އިމިގްްރޭޝަނުން ބުންޏެވެ.

ބަލާފާސްކުރުމުގެ އޮޕަރޭޝަނާ ގުޅޭގޮތުން، އިމިގްރޭޝަނާ ޕޮލިހުން ބޭއްވި ބައްދަލުވުމުގެ ތެރެއިން..

އިމިގްރޭޝަނުން ސަރުކާރުގެ ކަމާބެހޭ އިދާރާތަކާ ގުޅިގެން ކުރިއަށްގެންދާ މި އޮޕަރޭޝަނުގައި ޤަވައިދާ ހިލާފަށް ވިޔަފާރިކުރަމުން އަންނަ ގިނަ އަދަދެއްގެ ބިދޭސީން ވަނީ އަތުލައިގަނެފައެވެ. މީގެ ތެރޭގައި ފުޅާދާއިރާއެއްގައި ވިޔަފާރިކުރާ ބިދޭސީން ހިމެނޭއިރު، މީގެ ތެރެއިން ބައެއް މީހުން ވަނީ ޑީޕޯޓްވެސް ކޮށްފައެވެ. 

އިމިގްރޭޝަނުގެ ތަފާސްހިސާބުތަކަށް ބަލާއިރު، މިދިޔަ 10 މަސްދުވަހުގެ ތެރޭގައި ޤަވައިދާ ހިލާފަށް އުޅުނު 4،000 ހާހަށްވުރެ ގިނަ މީހުން ވަނީ ރާއްޖެއިން ޑީޕޯޓްކޮށްފައެވެ. މީގެ ތެރެއިން އެންމެ ގިނަ މީހުން ޑީޕޯޓްކޮށްފައިވަނީ މިހިނގާ ސެޕްޓެމްބަރުމަހުގެ ތެރޭގައެވެ. މިމަހުގެ މިހާތަނަށް 660 ހަށްވުރެ ގިނަ ބިދޭސީން ވަނީ ޑީޕޯޓްކޮށްފައެވެ.

ޤަވައިދާ ހިލާފަށް އުޅޭ ބިދޭސީންގެ މައްސަލައަށް ހައްލެއް ގެނައުމަކީ މިސަރުކާރުގެ ސިޔާސަތެކެވެ.މި ސިޔާސަތުގެ ދަށުން އިމިގްރޭޝަނުން ގެންދަނީ މާލެ ސަރަހައްދުގެ އިތުރުން، އަތޮޅުގެ ރަށްތަކުގައިވެސް ޤަވައިދާ ހިލާފަށް އުޅެމުން އަންނަ ބިދޭސީން ހޯދުމުގެ އޮޕަރޭޝަން ހިންގަމުންނެވެ.