ގުޖުރާތުގެ ގިރު ސޯމްނާތު ސަރަޙައްދުގައި ހުރި މިސްކިތަކާއި، ގަބުރުސްތާނެއް އިންޑިއާގެ އިދާރާތަކުން ނުކުމެ ފުނޑާލައިފިއެވެ.

މި ތަންތަން ފުނޑާލީ ސަރުކާރުގެ ބިންތަކުގައި ގާނޫނާ ޚިލާފަށް އިމާރާތް ކޮށްފައުވާ ތަންތަން ކަމަށް ބުނެއެވެ.

މީޑިއާ ރިޕޯޓުތަކުގައިވާ ގޮތުން، މި ތަންތަން ފުނޑާލާފައިވަނީ ސުޕްރީމް ކޯޓުގެ އަމުރާވެސް ޚިލާފަށެވެ. އެއީ ކޯޓުގެ ހުއްދައެއް ނެތި އެއްވެސް ތަނެއް ފުނޑާނުލުމަށް ސުޕްރީމް ކޯޓުން އަމުރުކޮށްފައިވަނިކޮށެވެ.

Advertisement

މިސްކިތާއި ގަބުރުސްތާނުގެ އިތުރުން، އެ ސަރަޙައްދުގައި ހުރި ގިނަ އަދަދެއްގެ ކޮންކްރީޓް ގެތައްވެސް ވަނީ ފުނޑާލާފައެވެ.

އޮފިޝަލުން ބުނާ ގޮތުގައި މި މަސައްކަތް ކުރީ ސޯމްނާތުގައި ހުންނަ ހިންދޫން އަޅުކަންކުރާ ތަނުގެ ކައިރީގައި ހުރި "ގާނޫނާ ޚިލާފު އިމާރާތްތައް" ނައްތާލުމަށާއި، ސޯމްނާތު ތަރައްޤީކުރުމުގެ މަޝްރޫޢަށް މަގުފަހިކުރުމަށެވެ

މި ތަންތަން ފުނޑާލުމާ ދެކޮޅަށް އިހުތިޖާޖުކުރި 150 އަށްވުރެ ގިނަ މީހުން ފުލުހުން ވަނީ ހައްޔަރުކޮށްފައެވެ.

މި ހާދިސާއާ ގުޅިގެން މުސްލިމް ޖަމާޢަތްތަކުން ވަނީ ކަންބޮޑުވުން ފާޅުކޮށް، މި ޢަމަލު ކުށްވެރިކޮށްފައެވެ. އަދި މި މައްސަލަ ތަޙުޤީޤުކޮށް، ޒިންމާވާ ފަރާތްތަކާތަކާމެދު ފިޔަވަޅު އެޅުމަށް ގޮވާލާފައެވެ.