ކުރީގެ ރައީސުންނަށް ދެމުންދާ އިނާޔަތްތައް މުރާޖަޢާކޮށް، ވަކި މިންގަނޑެއްގެ ދަށުން އުނިކުރުމުގެ މަސައްކަތް ލަންކާ ސަރުކާރުން ފަށައިފައެވެ.
ނަމަވެސް، ބައެއް އިނާޔަތްތައް އުނިކުރުމަށްޓަކައި ޤާނޫނީ އިސްލާހުތަކެއް ގެންނަންޖެހޭތީ، އެކަން ކުރިއަށް ގެންދެވޭނީ ކުރިއަށް އޮތް ގާނޫނު ހަދާ މަޖިލީހުން ކަމަށް އެ ގައުމުގެ އައު ސަރުކާރުން ބުނެއެވެ.
ލަންކާގެ މިހާރުގެ ރައީސް އަނުރާ ކުމާރާ ދިސަނާޔަކޭ ވަނީ އިންތިޚާބީ ވަޢުދެއްގެ ގޮތުގައި، ކުރީގެ ރައީސުންނަށް ދެމުންދާ އިނާޔަތްތައް، ޕެންޝަން ހިމެނޭގޮތަށް އުވާލުމަށް ވަޢުދުވެފައެވެ. ނަމަވެސް، މި އިނާޔަތްތައް ކަނޑައެޅިފައިވަނީ 1986 ވަނަ އަހަރު ފާސް ކުރެވުނު ރައީސުންގެ އިނާޔަތްތަކާބެހޭ ޤާނޫނު ނަންބަރު 4 ގެ ދަށުންނެވެ.
މި ޤާނޫނުގެ ދަށުން، ކޮންމެ ކުރީގެ ރައީސަކަށާއި، ކުރީގެ ރައީސެއްގެ އަނބިކަނބަލަކަށް، އެ ބޭފުޅެއްގެ އުމުރު ދުވަހަށް، އެކަށީގެންވާ ގެއެއް ކުއްޔަކާ ނުލައި ބޭނުންކުރުމުގެ ހައްޤު ލިބިދެއެވެ. އަދި އެފަދަ ގެއެއް ފޯރުކޮށްނުދެވޭ ހާލަތުގައި، މަހު ޕެންޝަންގެ ތިންބައިކުޅަ އެއްބަޔާ އެއްވަރުގެ އެލަވަންސެއް ދޭންޖެހެއެވެ.
މީގެ އިތުރުން، ކޮންމެ ކުރީގެ ރައީސަކަށް، ރައީސްގެ އަމިއްލަ ސެކްރެޓަރީގެ މަޤާމުގައި ހުންނަ މީހަކަށް ދެވޭ މުސާރައާ އެއްވަރުގެ ސެކްރެޓޭރިއަލް އެލަވަންސެއް ދޭންޖެހެއެވެ. އަދި ކުރީގެ ރައީސެއްގެ އަނބިކަނބަލަކަށް، ކެބިނެޓް މިނިސްޓަރެއްގެ އަމިއްލަ ސެކްރެޓަރީގެ މުސާރައާ އެއްވަރުގެ ސެކްރެޓޭރިއަލް އެލަވަންސެއް ދޭންޖެހެއެވެ.
މީގެ އިތުރުން، ކުރީގެ ރައީސުންނަށް ރަސްމީ ދަތުރުފަތުރާއި، ކެބިނެޓް މިނިސްޓަރުންނަށް ދެވޭ އެހެނިހެން އިނާޔަތްތައްވެސް ލިބިދެއެވެ. އަދި ޕެންޝަންވެސް ދައުލަތުގެ މާލިއްޔަތުން ދެވެއެވެ.
ސްރީލަންކާގެ އައު ރައީސްގެ އަރިސް ބޭފުޅަކާއި ހަވާލާދީ އެ ގައުމުގެ ނޫހަކުން ބުނެފައިވާ ގޮތުގައި، ސަރުކާރުން މި ހުރިހާ އިނާޔަތްތަކެއް މުރާޖަޢާކޮށް، އިންތިޚާބީ ވަޢުދާ އެއްގޮތަށް އުނިކުރުމަށް މިންގަނޑުތަކެއް އެކުލަވާލާނެއެވެ.
"އަޅުގަނޑުމެން ބަލާނަން އިތުރު އިނާޔަތްތަކެއް ދެވިފައި ހުރިތޯ. ޤާނޫނުގައި ބަޔާންކޮށްފައިވާ އިނާޔަތްތައް އުނިކުރެވޭނީ ހަމައެކަނި ޤާނޫނީ އިސްލާހުތަކެއް ގެނެސްގެން،" އެ ފަރާތުން ލަންކާގެ ނޫހަށް މައުލޫމާތު ދީފައިވެއެވެ.
މި މައްސަލަ މިއަދު ބޭއްވުމަށް ހަމަޖެހިފައިވާ ކެބިނެޓް ބައްދަލުވުމުގައި މަޝްވަރާކުރެވޭނެ ކަމަށް ވެސް މީޑިއާ ރިޕޯޓްތައް ބުނެއެވެ.
Advertisement
This content is created and paid for by advertisers and does not involve Voice Journalists
