ދުނިޔެ ވަށާ ދެވަނަ ހަނދެއް ނުވަތަ "މިނީ މޫން" އެއް ދަތުރުކުރަމުންދާކަމަށް ނާސާގެ ސައިންސުވެރިން ބުނެފިއެވެ.

"މިނީ މޫން" ތަކަކީ ދުނިޔޭގެ ގްރެވިޓީގެ ސަބަބުން ދުނިޔޭގެ ވަށައިގެން ދައުރުވާ ގޮތަށް ދަތުރުކުރާ އެސްޓަރޮއިޑްތަކެވެ. އަދި އެ ތަކެތި އޯބިޓުން ނެއްޓެންދެން އެގޮތަށް ދައުރުވަމުން ދާނެއެވެ. މި އެސްޓަރޮއިޑްތައް ދުނިޔޭގެ ވަށައިގެން ދައުރުވާ މުއްދަތު ބިނާވެފައި އޮންނަނީ އެ ތަކެތި ދުނިޔެއާ ކައިރިވާ ސްޕީޑާއި މަގުގެ މައްޗަށެވެ.

މިގޮތުން، މި އަހަރުގެ ސެޕްޓެމްބަރު މަހުގެ ފަހުކޮޅުން ފެށިގެން ނޮވެމްބަރު މަހުގެ ފަހުކޮޅާ ހަމައަށް، 2024 ޕީޓީ5 ނަމަކަށް ކިޔާ މި އެސްޓަރޮއިޑް ދުނިޔޭގެ ވަށައިގެން ދައުރުވާނެއެވެ. ބޮޑުމިނުގައި 10 މީޓަރު (33 ފޫޓު) ހުރި ނަމަވެސް، ހަމަލޮލަކަށް ނުފެންނާނެއެވެ. 

މި  އެސްޓަރޮއިޑް ފުރަތަމަ ފާހަގަކުރެވުނީ އޯގަސްޓް 7 ވަނަ ދުވަހު، ހަވާއީގެ މައުއީ ގައި ހުންނަ ހަލެއަކަލާ އޮބްޒަވޭޓަރީގައި ހުރި އެސްޓަރޮއިޑް ޓެރެސްޓްރިއަލް-އިމްޕެކްޓް ލާސްޓް އެލަރޓް ސިސްޓަމް (އެޓްލަސް) ބޭނުންކޮށްގެންނެވެ.

ތަރިތައް ދިރާސާ ކުރާ ފަރާތްތަކުން ފުރަތަމަ ނިންމީ އެއީ ޖައްވުގެ ކުނި ކޮޅެއް ކަމަށެވެ. ނަމަވެސް ފަހުން ބެލި ބެލުންތަކުން އެއީ އިރުގެ ވަށައިގެން ދައުރުވާ އެސްޓަރޮއިޑެއްކަން ވަނީ ކަށަވަރުކުރެވިފައެވެ.

ސައިންސުވެރިން ހާމަކުރިގޮތުގައި، މި އެސްޓަރޮއިޑް ދުނިޔޭގެ ވަށައިގެން ދައުރުވާނީ ސެޕްޓެމްބަރު 29 އިން ނޮވެމްބަރު 25 އާ ހަމައަށެވެ. އޭގެ ފަހުން ދުނިޔޭގެ ގްރެވިޓީގެ ބާރުން ނެއްޓި، އޭތި ޖައްވަށް ދޫވެގެންދާނެ އެވެ.