ދައުލަތުން ނަގާފައިވާ 500 މިލިއަން ޑޮލަރުގެ ސުކޫކަކަށް މި މަހު ދައްކަން ޖެހޭ ގާތްގަނޑަކަށް 25 މިލިއަން ޑޮލަރު މިއަދު ދައްކާފައިވާ ކަމަށް ފިނޭންސް މިނިސްޓްރީން ބުނެފި އެވެ.
ފިނޭންސް މިނިސްޓްރީން ނެރުނު ނޫސް ބަޔާނެއްގައި ބުނެފައިވާ ގޮތުގައި، 2026 ވަނަ އަހަރު މުއްދަތު ހަމަވާ މި ސުކޫކުގެ މި އަހަރުގެ އެންމެ ފަހުގެ ކޫޕަން ފައިސާ ދައްކާ ނިންމާފައިވަނީ 7 އޮކްޓޯބަރު 2023 ގައެވެ. މި ސުކޫކަކީ އަހަރަކު ދެފަހަރު، އޭޕްރިލް އަދި އޮކްޓޯބަރު މަހު ކޫޕަން ފައިސާ ދައްކަންޖެހޭ ސުކޫކެކެވެ.
ސަރުކާރުގެ ދަރަނި އަދާކުރުމަކީ އިސްކަންދޭ ކަމެއްކަމަށް ފިނޭންސް މިނިސްޓްރީން ބުނެފައިވެއެވެ. އަދި މި ކޫޕަން ފައިސާ ގަވާއިދުން ދެއްކުމަކީ ސަރުކާރުން ކްރެޑިޓަރުންނާއި އިންވެސްޓަރުންނަށް ދަރަނި އަދާކުރުމުގައި އޮތް އިލްތިޒާމު ހާމަކޮށްދޭ ކަމެއް ކަމަށްވެސް ބުނެފައިވެއެވެ.
މި ސުކޫކަކީ ސީނިއަރ އަންސެކިއުޑް ސުކޫކެއްގެ ގޮތުގައި 2021 ވަނަ އަހަރު ނެރެފައިވާ ސުކޫކެކެވެ.
ފިނޭންސް މިނިސްޓްރީން ބުނި ގޮތުގައި، މި ސުކޫކުގެ ފައިސާ ގަވާއިދުން ދެއްކުމަކީ ބައިނަލްއަޤްވާމީ މާލީ ބާޒާރުގައި ދިވެހިރާއްޖޭގެ އިތުބާރު އިތުރުވެ، ކުރިމަގުގައި އިތުރު ފައިނޭންސިންގ ހޯދުމަށް މަގުފަހިވެގެންދާނެ ކަމެކެވެ.
ސަރުކާރުން މިހާތަނަށް ނަގާފައިވާ ދަރަނިތައް ގަވާއިދުން ދައްކަމުންދާކަން ފާހަގަކޮށް، ކުރިމަގުގައިވެސް މިގޮތަށް ޢަމަލުކުރާނެ ކަމުގެ ޔަގީންކަން ފިނޭންސް މިނިސްޓްރީން ދީފައިވެއެވެ.
Advertisement
This content is created and paid for by advertisers and does not involve Voice Journalists
