ފާއިތުވެދިޔަ 18 ދުވަހުގެ ތެރޭގައި ފުލުހުން، 6،000 އަށް ވުރެ ގިނަ އުޅަނދު ބަލާ ފާސްކޮށްފިއެވެ.

ފުލުހުން ވަނީ 12 ސެޕްޓެމްބަރުން ފެށިގެން 30 ސެޕްޓެމްބަރާއި ހަމައަށް ހުޅުމާލޭގައި ކޮށްފައިވާ މަސައްކަތުގެ ހިސާބު އާއްމުކޮށްފައެވެ.

މިގޮތުން މި މުއްދަތުގައި ހުޅުމާލޭގައި ފުލުހުން ވަނީ 5،427 ސައިކަލާއި 1،266 ކާރު ހުއްޓުވައި، ބަލާފާސްކޮށްފައިއެވެ. އޭގެ ތެރެއިން 88 ކާރާއި 394 ސައިކަލަށް ފިޔަވަޅު އަޅާފައިވާއިރު، 10 ކާރާއި 102 ސައިކަލު ލައިންސަންސާއި ނުލައި ދުއްވާކަން ފުލުހުންނަށް ވަނީ ފާހަގަކުރެވިފައެވެ.

ހަމައެއާއިއެކު، 20 ސައިކަލު ޓޯކޮށް، 385 ކާރާއި 430 ސައިކަލެއްގެ ވެރިފަރާތަށް ނަސޭހަތްދީފައިވާއިރު، 3ކާރާއި 40 ސައިކަލެއް ނުރައްކާތެރިކޮށް ދުއްވާފައިވާކަމަށް ފުލުހުން ވަނީ ހާމަކޮށްފައެވެ.

ހަމައެއާއިއެކު، ޓްރެފިކް ވައިލޭޓްވެގެން 148 ސައިކަލަކާއި، 34 ކާރެއް ވެސް ހިފަހައްޓާފައިވާކަން ފުކުހުންގެ ތަފާސްހިސާބުތަކުން ހާމަވެއެވެ.

މާލެ ސަރަހައްދުގައި އެކްސިޑެންޓް ހިނގާ މިންވަރު އިތުރުވުމާއި ގުޅިގެން، މަގުމަތީގެ ސަލަމާތާއި ރައްކާތެރިކަން ކަށަވަރުކުރުމަށް ފުލުހުން ހަރުދަނާ ފިޔަވަޅުތަކެއް އަޅަމުން އަންނަކަން ފާހަގަކޮށްލަން ޖެހެއެވެ.