އިންޓަރނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ) ގައި ރާއްޖެއިން ބައިވެރިވުމުގެ މައްސަލަ ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.
މި މައްސަލަ ޚާރިޖީ ގުޅުންތަކުގެ ކޮމިޓީއަށް ފޮނުވާފައިވަނީ އައިއޭއީއޭގައި ބައިވެރިވުމަށް ވަޒީރުންގެ މަޖިލީހުގެ ނިންމެވުމާ ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، އެ މައްސަލަ މަޖިލީހަށް ހުށަހެޅުއްވުމުންނެވެ.
ރައީސް ޑރ.މުޢިއްޒު، މި މައްސަލައިގައި މަޖިލީހުގެ ރުހުން ހޯދުމަށް ހުށަހެޅުމަށް ނިންމަވާފައިވަނީ މިދިޔަ މަހުގެ 2 ވަނަ ދުވަހުއެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ނިއުކްލިއަރ މެޑިސިންގެ ދާއިރާއިން ބޭނުންވާ އެހީތެރިކަން ހޯދުމަށް އައިއޭއީއޭ އާއި ގުޅުމުގެ މަސައްކަތް ރާއްޖެއިން ފެށުމަށް ނިންމާފައިވާކަމަށް އޭރު ޚާރިޖީ ވަޒީރުގެ މަގާމުގައި ހުންނެވި، އަދި މިހާރުގެ މާލީ ވަޒީރު، މޫސާ ޒަމީރު ވަނީ ހާމަކުރައްވާފައެވެ.
މިގޮތުން ވަޒީރު ޒަމީރު ވިދާޅުވީ، އިދާރާއާ ގުޅެނީ އެކަމުގެ ސަބަބުން ރާއްޖެއަށް ފައިދާތަކެއް ލިބެން އޮތުމުންކަމަށާއި، މިފަދައިން އަމަލުކުރުމުން ނިއުކްލިއަރ މެޑިސިންގެ ދާއިރާއިން ރާއްޖެއަށް އެހީތެރިކަން ލިބިގެންދާނެ ކަމަށެވެ.
"ރައީސްގެ އެޖެންޑާގައި އެބައޮތް ކެންސަރ ހޮސްޕިޓަލް ވަރަށް އަވަހަށް ޚިދުމަތްދިނުން. އެކަމަށް ޒަމާނީ ބޭސްފަރުވާގައި ބޭނުންވޭ އެޓޮމިކް އެޖެންސީގެ އެހީތެރިކަން. މިކަމަށް ބޭނުންާ ބައެއް ވަސީލަތް ހޯދުމާއި ވެސްޓްމެނޭޖުމަންޓް. މިއީ އައިއޭއީއޭގެ މެންޑޭޓްގައި ހިމެނޭކަމެއް."
ވަޒީރު ޒަމީރު ވިދާޅުވިއެވެ.
އައިއޭއީއޭއާ ގުޅުމަށް ރާއްޖެއިން ކުރާ މަސައްކަތުގައި އުސްކޮށް ހަރަކާތްތެރިވާނީ ދިފާޢީ ވުޒާރާއިންކަމަށާއި، މިއީ ދިގު މުއްދަތެއްގެ ތެރެއިން ކުރެވޭނެ މަސައްކަތެއްކަން ސަރުކާރުން ވަނީ ހާމަކޮށްފައެވެ.
Advertisement
This content is created and paid for by advertisers and does not involve Voice Journalists
