މި ސަރުކާރުން، ދިވެހި ރާއްޖެ އައު އުސްމިން ތަކަކަށް ގެންދާނެ ކަމަށް އިދިކޮޅު މައި ޕާޓީ އެމްޑީޕީއަށް ނިސްބަތްވެވަޑައިގަންނަވާ ކެންދޫ ދާއިރާގެ މަޖިލިސް މެންބަރު، މަޢުރޫފް ޒާކިރު، ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ޓޫރިޒަމާ ބެހޭ ގާނޫނަށް ސަރުކާރުން ހުށަހަޅާފައިވާ އިސްލާޙް ތަކަށް ބަހުސް ކުރައްވަމުން މަޢުރޫފް ވިދާޅުވީ، ޓީޖީއެސްޓީއާއި، ފަތުރުވެރިކަމާއި ގުޅޭ އެހެން ޓެކްސް ބޮޑު ކުރުމާއި، ދައުލަތުގެ އާމްދަނީ އިތުރުކުރުމަށް ސަރުކާރުން އަޅަމުންދާ ފިޔަވަޅުތައް އަޅަންވާނީ ސްޓޭކްހޯޑަރުންނާ މަޝްވަރާ ކުރުމަށްފަހުގައި ކަމަށެވެ. އަދި މީގެ ކުރިންވެސް އޭނާ އެކަން ފާހަގަކުރެއްވި ކަމަށާ، ޓެކްސް ބޮޑުކުރާ ބިލުތަކާމެދު ހިތްހަމަ ނުޖެހުނީ ސްޓޭކްހޯޑަރުންވެސް އޭރު ނުރުހުން ފާޅުކުރުމުންކަމަށެވެ.

”ސަރުކާރުން މި ގެންނަ ބަދަލުތަކަށް، އިންތިހާއަށް ޓޫރިޒަމް އިންޑަސްޓްރީގެ ސިނާޢަތުގައި މަސައްކަތްކުރާ ފަރާތްތަކުން އެބަ މަރުހަބާ ކިޔާ. މި ބަދަލުތަކާއެކު އިރާދަލުރެއްވިއްޔާ ދިވެހިރާއްޖެ އައު އުސްމިންތަކަކަށް ގޮސް، ދިވެހިން ބޭނުންވާ ތަރައްގީ، އަންނަ އަހަރު ނިމެންވާއިރަށް ލިބޭނެ ކަމަށް އަޅުގަނޑު ޝައްކެއް ނުކުރަން“ މައުރޫފް ވިދާޅުވިއެވެ. 

މިއާއެކު މަޢުރޫފް ވިދާޅުވީ، ފަތުރުވެރިކަމުގެ ސިނާޢަތް ސިންދަފާތު ކުރެވި، ބަންކަރިންގ ގެ ޚިދުމަތް ފަށައި، ޑޮލަރުގެ މައްސަލަ ހައްލުކޮށް، ”މި އަހަރު އެއްކޮށް މި ދުއްވާލަނީ ގާނޫނުތައް ބަދަލުކޮށްގެން ދައުލަތުގެ އާއްދަނީ އިންތިހާއަށް އިތުރު ކުރަން“ ކަމަށެވެ. 

އެހެން ކަމުން، ”ރައްޔިތުން ތިބީ އުފަލުން ހެވިދިލިފައި“ ކަމަށާ، ރަށްރަށުން ވެރިކަންކުރާ ޕީއެންސީއަށް ވަންނަ މެންބަރުން އިންތިހާއަށް އިތުރުވަމުންދާ ކަމަށް އޭނާ ވިދާޅުވިއެވެ. ވުމާއެކު ސަރުކާރުން ހުށަހަޅަމުންދާ ބިލުތަކާމެދު އޭނާގެ އެއްވެސް ކަންބޮޑުވުމެއް ނެތް ކަމަށް މައުރޫފް ވިދާޅުވިއެވެ. 

މައުރޫފް ވީދަޅުވީ، ސަރުކާރުގެ ބިލު ތަކަށް ތާއީދު ކުރެވޭތޯ ވަރަށް މަސައްކަތް ކުރައްވާނެ ކަމަށާ، އަދި އޭނާއަށް ވީ މިންވަރަކުން އެ ބިލުތައް ޕްރޮމޯޓްކޮށް އެ ގެންނަ ހެޔޮ ބަދަލުތަކާމެދު ރައްޔިތުންނަށް ވިސްނައިދެއްވައި ބިލުތަކަށް ވަކާލާތު ކޮށްދެއްވާނެ ކަމަށެވެ.