ގްރީން ޓެކުހާއި އެއާޕޯޓް ޓެކްސް ބޮޑުކުރަން ސަރުކާރުން ހުށައެޅި ބިލްތައް މަޖިލީހަށް ބަލައިގަނެ ދިރާސާކުރަން ކޮމެޓީއަށް ފޮނުވައިފިއެވެ.

އަންނަ ޖެނުއަރީން ފެށިގެން ގްރީން ޓެކްސްއަށް މިހާރު ނަގާ އަދަދަށް ވުރެ ދެ ގުނަ ބޮޑުކޮށް ނަގާ ގޮތަށް އިސްލާހު ގެނައުމަށް ސަރުކާރުން ވަނީ ހުށަހަޅާފައެވެ.

ގްރީން ޓެކްސްއާއި ގުޅޭގޮތުން، ސަރުކާރުން ހުށަހެޅި އިސްލާހުގައި ބުނާގޮތުން އަންނަ އަހަރުން ފެށިގެން ކުރިން ހަ ޑޮލަރު ދައްކަމުން އައި ތަންތަނުން 12 ޑޮލަރު ދައްކަން ޖެހޭނެ އެވެ. އަދި ތިން ޑޮލަރު ދައްކަމުން އައި ތަންތަނުން ހަ ޑޮލަރު ދައްކަން ޖެހޭނެ ކަމަށް އެ އިސްލާހުގައި ބުނެފައިވެއެވެ.

Advertisement

ހަމައެއާއިއެކު، އަންނަ ޑިސެމްބަރުމަހުގެ އެއްވަނަ ދުވަހުން ފެށިގެން އެއާޕޯޓު ފީ ބޮޑު ކުރާ ގޮތަށް ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމާ ބެހޭ ގާނޫނަށް އިސްލާހު ގެނައުމަށްވެސް ސަރުކާރުން ވަނީ ހުށަހަޅާފައެވެ.

މި ބިލްގައިވާ ގޮތުން އެއާޕޯޓުން ފުރާ މީހުން އަތުން ނަގާ އެއާޕޯޓް ޑިވެލޮޕްމެންޓް ޗާޖާއި ޑިޕާޗާ ޓެކްސަށް ގެންނަ ބަދަލުތަކަށް މިއަހަރުގެ ޑިސެމްބަރުމަހުގެ 1 ވަނަ ދުވަހުން ފެށިގެން އަމަލުކުރަން ވަނީ ނިންމާފައެވެ. މި ޓެކްސްތަކަށް ބަދަލު އައިނަމަވެސް އާއްމު ދިވެހިން އަތުން ނަގާ ޓެކްސްއަށް އެއްވެސް ބަދަލެއް ނުގެނެއެވެ.

މި ދެ ބިލު ވެސް މަޖިލިސް ޖަލްސާއަށް ހުށަހަޅާފައި ވަނީ މިދިޔަ ހޯމަ ދުވަހު އެވެ.

މި ދެ ބިލު މަޖިލީހަށް ބަލައިގަތީ ވޯޓުގައި ބައިވެރިވެވަޑައިގެންނެވި މެންބަރުންގެ ތެރެއިން 58 މެންބަރުންގެ ވޯޓުންނެވެ. އެ ބިލު ބަލައިގަންނަން ނުފެންނަ ކަމަށް 10 މެންބަރުން ވޯޓު ދެއްވި އިރު، އެ ހުރިހާ މެންބަރުންނަކީ ވެސް އެމްޑީޕީގެ މެންބަރުންނެވެ.