ބ.ހިތާދޫގައި ފުލުހުން "ފަހިރައްކާ"ގެ ނަމުގައި ޕްރޮގްރާމެއް ފަށައިފިއެވެ.
ފުލުހުން ބުނި ގޮތުގައި، މިއީ ހިތާދޫ ޕޮލިސް ޕޯސްޓުން އިސްނަގައިގެން ރަށުގެ މުއައްސަސާތަކާ ގުޅިގެން އޮކްޓޫބަރު 15 އިން ނޮވެމްބަރު 3 އަށް ކުރިއަށްގެންދާ ޕްރޮގްރާމެކެވެ.
މި ޕްރޮގްރާމުގައި، ހިތާދޫގައި ދިރިއުޅޭ އަންހެނުންނަށް ހާއްސަކޮށްގެން 20 ދުވަހަށް ކުރިއަށް ގެންދާ ކަސްރަތު ކްލާސްތަކަކާއި ސްކޫލުގެ ގްރޭޑް 6 އިން 9 އަށް ތައުލީމު ހާސިލުކުރަމުންދާ ދަރިވަރުންނަށާއި ސްކޫލު މުދައްރިސުންނަށް ހާއްސަކޮށްގެން 20 ދުވަހަށް ސުވިމިންގ ކްލާސްތަކެއް ކުރިއަށް ގެންދިއުމަށްވަނީ ހަމަޖެހިފައިވާކަމަށް ފުލުހުން މައުލޫމާތުދެއެވެ.
ހަމައެއާއިއެކު، ފުލުހުން ބުނީ، "ފަހިރާސްތާ" ނަމުގައި ސްކޫލު ދަރިވަރުންނާއި ބެލެނިވެރިންނާއި، ރަށުގެ މުއައްސަސާތަކާއި ކުލަބް ޖަމުއިއްޔާތަކަށް ޓްރެފިކް ސެޝަންތަކެއް ކުރިއަށް ގެންދިއުމަށް ހަމަޖެހިފައިވާކަމަށެވެ.
މީގެ އިތުރުންވެސް، އެކި ކަންކަމާއި ގުޅޭ ހޭލުންތެރިކަމުގެ ސެޝަންތަކާއިއެކު، ރަށުގެ މުއައްސަސާތަކުގެ މުވައްޒަފުންގެ މެދުގައި ޓީމް ބިލްޑިންގ ހަރަކާތްތަކެއް ވެސް ކުރިއަށް ގެންދިއުމަށް ވަނީ ހަމަޖެހިފައިވާކަމަށް ފުލުހުން މައުލޫމާތުދެއެވެ.
ފުލުހުން އިތުރަށް ބުނީ، މި ޕްރޮގްރާމުގައި ހިމެނޭ ކްލާސްތަކަކީ ހިތާދޫ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީ އަދި ސްކޫލާ ބައްދަލުކޮށް ރަށަށް މިވަގުތު އެންމެ މުހިންމުކަމަށް ފާހަގަކޮށްފައިވާ ކަންކަމަށް އަލި އަޅުވާލައިގެން އެކުލަވައިލާފައިވާ ކްލާސްތަކެއްކަމަށާއި، މި ޕްރޮގްރާމް ހިންގުމުގައި މި މުއައްސަސާތަކުގެ ފުރިހަމަ އެއްބާރުލުން ލިބެމުންދާކަމަށެވެ.
Advertisement
This content is created and paid for by advertisers and does not involve Voice Journalists
