އިންޑިއާ އާއި ޗައިނާއިން ދެގައުމުގެ ބޯޑަރު ބެލެހެއްޓުމުގައި ދެގައުމުގެ ގުޅިގެން މަސައްކަތްކުރާ ގޮތަށް އެއްބަސްވެފައިވާކަމަށް އިންޑިއާގެ ފޮރިން ސެކްރެޓަރީ ވިކްރަމް މިސްރީ ބުނެފިއެވެ.
މިއީ 2020 ވަނަ އަހަރު ހިމާލަޔާގައި ހުރި ދެ ގައުމުގެ ދެމެދުގައި ޚިލާފު އުފެދިފައިވާ ސަރަޙައްދާއި ގުޅޭ މައްސަލަ ހައްލުވުމަށް މަގުފަހިވެދާނެ ކަމެއް ކަމަށް ގިނަ ބަޔަކު އަންނަނީ ބުނަމުންނެވެ.
މިގޮތުން ވިކްރަމް މިސްރީ ބުނީ، ދެ ގައުމުގެ ދެމެދުގައި ކަނޑައަޅާފައިވާ ވަގުތީ ބޯޑަރު ކަމަށްވާ، އެލްއޭސީ (ލައިން އޮފް އެކްޗުއަލް ކޮންޓްރޯލް) ގައި ފޯރިމެރުމާއި ގުޅޭ ގޮތުން އެއްބަސްވުމަކަށް އައިސްފައިވާކަމަށެވެ.
އެލްއޭސީ ގައި މީގެ ކުރިން އެތަކެއް ފަހަރު ހަމަނުޖެހުންތައް ހިނގާފައިވާއިރު، މި ހަމަނުޖެހުންތަކުގައި އެތައް ސިފައިންނެއް މަރުވެ ޒަޚަމް ވެފައިވާކަން ވެސް ފާހަގަކޮށްލަން ޖެހެއެވެ.
އެލްއޭސީ އަކީ ހިމާލަޔާގައި ހިމެނޭ 3،488 ކިލޯމީޓަރު (2،167 މޭލު) ދިގު ސަރަޙައްދީ ރޮނގެކެވެ. މި ރޮނގަކީ އޭޝިޔާގެ ދެ ބޮޑު ޤައުމު ކަމުގައިވާ އިންޑިޔާ އާއި ޗައިނާ ހިއްސާކުރާ ސަރަޙައްދީ ރޮނގެކެވެ.
ޗައިނާއިން މި ރޮނގުގެ ކުޑަ ބަޔަކަށް ދައުވާ ކުރާއިރު، މި ރޮނގުން ވަކިކުރަނީ ހުޅަނގުން ލަޑާޚް އިން ފެށިގެން އިރުމަތީގައިވާ އިންޑިޔާގެ އަރުނާޗަލް ޕްރަދޭޝް ސްޓޭޓާ ހަމައަށް އޮތް ޗައިނާ އާއި އިންޑިޔާގެ ބާރުގެ ދަށުގައިވާ ސަރަޙައްދުތަކެވެ.
ޗައިނާއިން އަރުނާޗަލް ޕްރަދޭޝްގެ މުޅި ސަރަޙައްދަށް ދަޢުވާކުރާއިރު، އެ ސަރަޙައްދަކީ އެ ޤައުމުގެ ޓިބެޓް ސަރަޙައްދުގެ ބައެއް ކަމުގައި ދެކެއެވެ.
Advertisement
This content is created and paid for by advertisers and does not involve Voice Journalists
