ސިނގިރޭޓާއި ދުންފަތުން ނަގައި ޓެކްސް ބޮޑުކޮށް، އީ-ސިނގިރޭޓު އަދި ވޭޕު މަނާކުރާގޮތަށް އެކްސްޕޯޓް އިންޕޯޓް ގާނޫނަށް އިސްލާޙް ހުށަހަޅައިފިއެވެ. 

ސަރުކާރުގެ ފަރާތުން މި އިސްލާޙް ހުށަހެޅުއްވީ، މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު) އެވެ. 

އިއްބެ ހުށަހެޅުއްވި އިސްލާޙްގައި ހުށަހެޅުއްވުމުގެ، މަގުސަދުގެ ގޮތުގައި މެންބަރު އިއްބެ ވިދާޅުވީ، ދުންފަތާއި، ދުންފަތުން އުފައްދާ ބާވަތްތަކާއި ދުންފަތުގެ ބަދަލުގައި ބޭނުންކުރެވޭ ބާވަތއތަކުން ނަގަމުން އަންނަ އިމްޕޯޓް ޑިޔުޓީ ޓެކްސްގެ މިންވަރު އިތުރު ކުރުމެވެ.

Advertisement

އަދި، ދުންފަތް ކޮންޓްރޯލް ކުރުމާ ބެހޭ ގާނޫނުގެ ދަށުން އީ ސިނގިރޭޓާއި ވޭޕް ކުރުމަށް ބޭނުންކުރާ އާލާތްތައް ރާއްޖެއަށް އެތެރެކުރުން މަނާ ކުރެވޭ ތާރީޚާ ހަމައަށް، މި ހިނގާ މުއްދަތުގައި ރާއްޖެއަށް ގެނެވޭ އެފަދަ ތަކެތިން ނަގާ އިމްޕޯޓް ޑިޔުޓީގެ މިންވަރު އިތުރުކުރުމެވެ. 

މީގެ އިތުރުން، ރާއްޖޭގެ އެކްސްޕޯޓް އިމްޕޯޓް ގާނޫނުގެ ދަށުން ނެގޭ އިމްޕޯޓް ޑިޔުޓީއާއި ރޯޔަލްޓީއާއި ރެވެނިޔުފީ މަޢާފްކުރެވޭ ހާލަތްތަކާއި އުސޫލުތައް ބަޔާންކުރުމަށް އެ ގާނުނަށް އިސްލާހު ގެނައުންވެސް މި ބިލު ހުށަހެޅުމުގެ މަގުސަދުގެ ތެރޭގައި ހިމެނެއެވެ. 

މެންބަރު އިއްބެ ވަނީ މި ބިލުގެ މަސައްކަތް ކޮމިޓީން އަވަހަށް ނިންމައި ފާސްކުރުމަށް އެދިވަޑައިގެންފައެވެ.

ރައީސް ވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށް ނިންމަވާފައެވެ. އަދި ދުންފަތުން އުފައްދާފައިވާ ތަކެތި ގަނެވިއްކޭނެ އެންމެ ހަގު އުމުރު، 21 އަހަރަށް ކަނޑައެޅުމަށް ރައީސުލްޖުމްހޫރިއްޔާ ވަނީ ނިންމަވާފައެވެ.