ދައުލަތުގެ ސަޕްލިމެންޓަރީ ބަޖެޓު ދިރާސާކުރަން އެކުލަވާލާފައިވާ ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމިޓީއަށް މާލީ ވަޒީރު މޫސާ ޒަމީރާއި، މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަރު މުނައްވަރާއި، އޮޑިޓަރ ޖެނެރަލް ޙުސައިން ނިޔާޒީ ހާޒިރުކުރުމަށް ކޮމިޓީން ފާސްކޮށްފިއެވެ.
މާދަމާ މެންދުރުފަހު 14:00 ގައި ބާއްވާ ބަޖެޓު ކޮމިޓީއަށް މާލީ ވަޒީރާއި އޮޑިޓަރ ޖެނެރަލް އަދި އެމްއެމްއޭގެ ގަވަރުނަރު ހާޒިރުވާންޖެހޭގޮތަށް އަދިބަޖެޓާ ގުޅޭގޮގުން މެންބަރުން ސުވާލު ކުރުމަށާއި، ބަޖެޓާ ގުޅޭގޮތުން މަޝްވަރާކުރުމަށް އެބޭފުޅުން ހާޒިރުކުރުމަށް ހުށައެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާޢުއެވެ.
މީގެ އިތުރުންވެސް ޝުޖާޢު ވަނީ މާދަމާ ކޮމިޓީއަށް ހާޒިރުކުރާ 3 ބޭފުންނާ ސުވާލުކުރުމުގެ ސެޝަން ނިންމަވާލެއްވުމަށްފަހު، ބަޖެޓު ފާސްކުރާ ގޮތަށް ވެސް ހުށަހަޅުއްވާފައެވެ.
މި ހުށައެޅުމަށް މާމިގިލީ ދާއިރާގެ މެންބަރު ޤާސިމް އިބްރާހީމް ތާއީދު ކުރެއްވިއިރު، ޝުޖާއުގެ ހުށަހެޅުންތައް ވަނީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައެވެ.
މިއަހަރަށް ސަރުކާރުން ހުށައެޅުއްވި ސަޕްލިމެންޓަރީ ބަޖެޓު ދިރާސާކުރަން އެކުލަވާލި ކޮމިޓީގެ މުޤައްރިރަކަށް ފުވައްމުލަކު މެދު ދާއިރާގެ މެންބަރު ޢަލީ ފަޒާދު އަދި ނައިބު މުޤައްރިރަކަށް ކަނޑައަޅާފައިވަނީ އޭދަފުށީ ދާއިރާގެ މެންބަރު އަޙްމަދު ސަލީމް ވަނީ ކަނޑައަޅާފައެވެ.
Advertisement
This content is created and paid for by advertisers and does not involve Voice Journalists
