"ފަލަސްތީނާއި އެކު ދިވެހީން" ޓެލެތޯނުން ލިބުނު ފައިސާ އދ ގެ ފަލަސްތީނުގެ ރެފިއުޖީންނަށް ހާއްސަ ޖަމިއްޔާ، ޔުނައިޓެޑް ނޭޝަންސް ރިލީފް އެންޑް ވާކްސް އޭޖެންސީ ފޯ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވިކަމުގެ ލިޔުން ސަރުކާރުން ހާމަކޮށްފިއެވެ.

މި ލިޔުން ސަރުކާރުން ހާމަކޮށްފައިމިވަނީ ޓެލެތޯނުން ލިބުނު ފައިސާއާމެދު ބައެއް ފަރާތްތަކުން ސުވާލު އުފައްދަމުން ދަނިކޮށެވެ.

މިގޮތުން ޚާރިޖީ ވުޒާރާއިން ނެރުނު ނޫސްބަޔާނެއްގައި ބުނީ، މި ފައިސާ އޮގަސްޓް 20 ވަނަ ދުވަހު އަންރުވާއަށް ފޮނުވާފައިވާ ކަމަށެވެ.

Advertisement

ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ޕީއެސްއެމް އިން  ޖޫން 12 ވަނަ ދުވަހު ބޭއްވި މި ޓެލެތޯނުން 1.24 މިލިއަން ޑޮލަރު ލިބުނުއިރު، އޮޑިޓް ފާމް އެއްކަމަށްވާ ކްރޯވ މޯލްޑިވްސް އެލްއެލްޕީ އިން ކަށަވަރުކޮށްދީފައިވާކަމަށް އެ ވުޒާރާގެ ނޫސްބަޔާނުގައި ވެއެވެ.

ޚާރިޖީ ވުޒާރާއިން ބުނީ، މި ފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށްޓަކައި ދިވެހިން ހަދިޔާކުރުމަކީ ފަލަސްތީނުގެ މިނިވަންކަމަށް ރާއްޖެއިން ކުރާ ތާއީދާއި، އަބަދުވެސް، އަދި ވަކީން ޚާއްސަކޮށް މިފަދަ ދަތި އުނދަގޫ ދަނޑިވަޅެއްގައި އެގައުމުގެ ރައްޔިތުންނާއެކު ދިވެހިން ތިބިކަމުގެ އަލިގަދަ ހެއްކެއް ކަމަށެވެ.

ފަލަސްތީނުގެ ރައްޔިތުންނާއި ދެކޮޅަށް އިސްރާއީލުން ހިންގަމުންދާ ނަސްލު ނައްތާލުމުގެ އަމަލުތަކާއި ބައިނަލްއަގުވާމީ ގާނޫނާއި ޚިލާފަށް ދެމުންގެންދާ ހަމަލާތައް ހަރުކަށި ބަހުން ކުށްވެރިކުރާކަން ފާހަގަކުރަމުން އެ ވުޒާރާއިން ބުނީ، މި ފައިސާ ހަރަދުކުރާނެ ކުރު މުއްދަތުގެ އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓްތަކާއި ގުޅޭގޮތުން އަންރުވާ އާއި އެކު މަޝްވަރާ ކުރަމުން އަންނަ ކަމަށެވެ.

މިއާއިއެކު، އެ ވުޒާރާއިން ވަނީ މި ބަޔާނުގައި، މި ފައިސާ ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަންރުވާއަށް ޖަމާކުރިކަމުގެ ޑެބިޓު އެޑްވައިޒުގެ ކޮޕީ އާއި އަންރުވާ ފޯ ޕަލަސްތީން އެކައުންޓަށް ރާއްޖެއިން ފޮނުވި ފައިސާ ލިބިފައިވާކަން ކަށަވަރުކޮށްދީ ޖޭޕީ މޯގަން ބޭންކުން ދިން ލިޔުން އާންމުކޮށްފަ އެވެ.