މިއަހަރުގެ ކުރިއަށް އޮތްތަނުގައި ހަރަދުކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ސަޕްލިމަންޓްރީ ބަޖެޓް މިއަދު މިވަނީ ބަޖެޓް ކޮމިޓީން ފާސްކޮށްފައެވެ. ޚަރަދުތައް ކޮންޓްރޯލް ކުރުމަށް އެޅި ފިޔަވަޅުތަކާއި އެކީ، ސަޕްލިމަންޓަރީ ބަޖެޓްގެ ގޮތުގައި ކަނޑައަޅާފައިވަނީ 5.1 ބިލިއަން ރުފިޔާއެވެ.

ފިނޭންސް މިނިސްޓަރު މޫސާ ޒަމީރު ވިދާޅުވެފައިވަނީ، ސަޕްލިމަންޓަރީ ބަޖެޓެއް ހުށަހަޅަންޖެހުނީ، ބަޖެޓުގައި ހިމަނާފައިވާ ރިފޯމްތައް ތަންފީޒުކުރަން ކުރަންޖެހޭ މަސައްކަތްތަކުގެ ބޮޑުބައި ކުރަންޖެހުމުން، އަންދާޒާކޮށްފައިވާ މިންވަރަށްވުރެ ވަގުތު ނަގައި، ޚަރަދު އިތުރުވާނެކަމަށް ލަފާކުރެވުމުން ކަަމަށެވެ. އަދި ސަރުކާރުން ރައްޔިތުންނަށް ފޯރުކޯށްދޭންޖެހޭ ހިދުމަތްތައް ހުއްޓުމެއްނެތި ފޯރުކޯށްދިނުން ކަމަށެވެ.

ސަޕްލިމަންޓަރީ ބަޖެޓާ ގުޅޭގޮތުން އިދިކޮޅު ފަރާތްތަކުން ބުނެފައިވަނީ، އަހަރުގެ މިހާތަނަށް ކުރި ހަރަދުތައް އާއްމުނުކޮށް ސަޕްލިމަންޓަރީ ބަޖެޓަށް ރުހުންދެވެން ނެތްކަމަށެވެ.

ބަޖެޓް ދިރާސާކުރާ ކޮމިޓީގައި ސަޕްލިމަންޓަރީ ބަޖެޓާ ގުޅޭގޮތުން އޮޑިޓަރ ޖެނެރަލްގެ ފަރާތުންވެސް ވަނީ މުހިއްމު ކަންތައްތަކެއް ފާހަގަކުރައްވާފައެވެ. އޮޑިޓަރ ޖެނެރަލްގެ ފަރާތުން އެންމެބޮޑަށް ފާހަގަކުރި ކަންކަމުގެ ތެރޭގައި ހިމެނެނީ ދައުލަތަށް އެކިގޮތްގޮތުން ލިބޭނޭ ކަމަށް އަންދާޒާކުރި އާމްދަނީ އާ އެއްވަރަށް މިހާހިސާބަށް އާއިރުވެސް އާމްދަނީ ލިބިފައި ނުވުމެވެ. އެހެންކަމުން ސަޕްލިމަންޓަރީ ބަޖެޓްގައި ލިބޭނޭކަމަށް ފާހަގަކޮށްފައިވާ އަދަދުތައް ލިބޭނޭކަމުގެ ޔަގީންކަން ނެތްކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

މިގޮތުން ސަޕްލިމަންޓަރީ ބަޖެޓާއެކު ދައުލަތުގެ މިހާރުގެ ޖުމްލަ ދަރަންޏަށް މިއަހަރު އަލަށް 22 ބިލިއަން ރުފިޔާ އިތުރުވެގެންދާނޭކަމަށް އޮޑިޓަރ ޖެނެރަލްގެ ރަޢުޔުގައި ވަނީ ވިދާޅުވެފައެވެ. 

ސަޕްލިމަންޓްރީ ބަޖެޓާ ގުޅޭގޮތުން އޮޑިޓަރ ޖެނެރަލް ހުށަހެޅުއްވި ރަޢުޔުއަށްފަހު ފިނޭންސް މިނިސްޓްރީގެ ފަރާތުން ވާހަކަދައްކަވަމުން ޑެޕިއުޓީ މިނިސްޓަރު އަހުމަދު ސާއިދު ވަނީ، ވަރަށް ތިލަކޮށް ސަޕްލިމަންޓްރީ ބަޖެޓް ހުށަހަޅަންޖެހުނު ސަބަބު ބަޔާންކޮށްދެއްވާފައެވެ.

އޭނާ ވިދާޅުވީ، 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅިއިރު އޭގެ ތެރެއިން ރިކަރަންޓް ހަރަދަކީ 1.5 ބިލިއަން ރުފިޔާ ކަމަށެވެ. ބަޖެޓްގެ ބޮޑު ބަޔަކީ ކެޕިޓަލް ހަރަދެވެ. އެއީ 3.6 ބިލިއަން ރުފިޔާއެވެ. 

ސާއިދު ވިދާޅުވީ ޕީއައިއެސްޕީގެ ދާއިރާއަށް ސަޕްލިމަންޓްރީ ބަޖެޓުގެ ބޮޑުބައެއް ހޭދަކުރަންޖެހުނީ ކުރިއަށްދާ ބައިވަރު ޕްރޮޖެކްޓުތައް ހުރީމަކަމަށެވެ.

ސަޕްލިމަންޓަރީ ބަޖެޓަށް ބަލާއިރު، ރިކަރަންޓް ހަރަދުގެ ތެރެއިން މުއައްޒަފުންގެ މުސާރަ ނަގާފައި އެންމެބޮޑީ ސަބްސިޑީގެ ގޮތުގައި ހަރަދުކުރުމަށް ކަނޑައަޅާފައިވާ އަދަދެވެ. ސަބްސިޑީގެ ގޮތުގައި ވަނީ އެއް ބިލިއަނަށްވުރެ ގިނަ ރުފިޔާ ޖަހާފައެވެ.

މިއަހަރުގެ ބަޖެޓް ހުށަހެޅިއިރު، ކުރިން ނިންމާފައި އޮތީ ޖުލައިމަހުގެ އެއްވަނަ ދުވަހުން ފެށިގެން ސަބްސިޑީތައް ކަނޑާލައި އައު އުސޫލުގެ ދަށުން ސަބްސިޑީ ދޭށެވެ. ނަމަވެސް ސަރުކާރު ބަދަލުވިއިރުވެސް އެކަމަށް ތައްޔާރުވެފައި ނެތުމާއެކު، އަދިވެސް ސަބްސިޑީ ރިފޯމްކުރުމުގެ ކަންކަން ތަންފީޒު ކުރެވިފައި ނުވާކަމަށް ފިނޭންސުން ވަނީ ބުނެފައެވެ. އެހެންކަމުން ސަބްސިޑީ ކަނޑާލެވެން ނެތްއިރު، ސަޕްލިމަންޓަރީ ބަޖެޓްގައި އެބައި ހިމެނުން ނޫން ގޮތެއް ނެތްކަމަށް ފިނޭންސުން ބުނެއެވެ.