އައްޑޫސިޓީ ފިޝަރީޒް ކޮމްޕްލެކްސްގެ ކެޕޭސިޓީ ބޮޑުކުރުމުގެ މަސައްކަތަށް ބޭނުންވާ ފައިސާ ހަމަޖެހިފައިވާ ކަމަށާ، އެ މަސައްކަތް އަންނަ އަހަރު ފެށޭނެ ކަމަށް މަސްވެރިކަމާބެހޭ ވަޒީރު އަހުމަދު ޝިޔާމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ވަޒީރު މަޖިލީހަށް ހާޒިރުކޮށް، މަރަދޫ ދާއިރާގެ މެންބަރު އަހުމަދުދީދީ ވަނީ، އައްޑޫ ފިޝަރީޒް ކޮންޕެލެކްސް ބޮޑު ކުރުމަކީ މި ސަރުކާރުގެ ވައުދެއްކަން ފާހަގަކުރައްވައި، އެ މަސައްކަތް ފެށޭނީ ކޮން އިރަކުންތޯ ސުވާލު ކުރައްވާފަ އެވެ.
މަރަދޫ ދާއިރާގެ މެންބަރު އަހުމަދުދީދީ
އެ ސުވާލަށް ޖަވާބު ދެއްވަމުން ޝިޔާމް ވިދާޅުވީ، ރާއްޖޭގައި މަސްވެރި ސިނާއަތަށް އޮތް އެންމެ ބޮޑު ގޮންޖެހުމަކީ ހުރިހާ ގޮތަކުންވެސް ކެޕޭސިޓީ ނެތުން ކަމަށެވެ. އެގޮތުން ފެލިވަރު ވުޖޫދުވިތާ ބައި ގަރުުނު ގުނަން ދާއިރުގައި، ތަން ފަށައިގެން އިރު ހުރި ހާލަތާއި މިއަދާއި މާ ބޮޑު ތަފާތެއް ނެތްކަމަށް ޝިޔާމް ވިދާޅުވިއެވެ. އަދި ކަމަށާއި މިފްކޯ ވުޖޫދުވިތާ 28 އަހަރުވީއިރު ވަސީލަތްތައް ތަރައްގީ ނުވެ އޮތްކަން މިނިސްޓަރު ޝިޔާމް ފާހަގަ ކުރެއްވި އެވެ.
މި ސިނާއަތް ކުރިއެރުވުމަށްޓަކައި މާ ގިނަ މަސައްކަތްތަކެއް ކުރެވިފައެއް ނެތް، މިފްކޯ ވުޖޫދުވީ ފަހުންވެސް 28 އަހަރުވީއިރުގައި މަސްވެރި ސިނާއަތުގައި ދިވެހިރާއްޖޭގެ މަސްވެރިން ތަރައްގީވެގެން އައި ގޮތަށް މަސްވެރިން އަތުން މަސް ގަންނަ ވަސީލަތްތައް ތަރައްގީ ނުވެ ހުރި ހުރުން، މިއީ ހަގީގަތުގައި މިއަދު އަޅުގަނޑުމެންނަށް އޮތް އެންމެ ބޮޑު ގޮންޖެހުން.
މަސްވެރިކަމާބެހޭ ވަޒީރު އަހުމަދު ޝިޔާމް
މިއާއެކު ޝިޔާމް ވިދާޅުވީ، އައްޑޫ ހުޅުދޫގައި ގާއިމްކުރެވިފައިވާ ފެސިލިޓީގެ ކެޕޭސިޓީ އިތުރުކުމުގެ ވާހަކަ ކުރީ ސަރުކާރުންވެސް ވަރަށް ބޮޑަށް ދެއްކި ކަމަށެވެ. އެގޮތުން 2019 ވަނަ އަހަރުން ފެށިގެންވެސް އެވާހަކަ ދައްކަމުން އައި ނަމަވެސް، މިކަމުގައި އަމަލީ ސިފަ ޖެއްސުމަށްޓަކައި އެއްވެސް މަސައްކަތެއް ކޮށްފައިނުވާކަން އޭނާ ފާހަގަކުރެއްވިއެވެ.
އެހެން ނަމަވެސް، ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވެރިކަމަށް ވަޑައިގެން، މަސްވެރި ސިނާޢަތުގައި ހުރި ގޮންޖެހުންތަކަށް ހައްލު ހޯދުމަށް ކުރައްވަމުން ގެންދަވާ މަސައްކަތްތަކުގެ ތެރެއިން އެންމެ ފުރަތަމަވެސް ފެއްޓެވި މަސައްކަތް ތެރޭގައި މި މަސައްކަތް ހިމެނޭ. މިފްކޯ މެދުވެރިކޮށް މި މަސައްކަތް ކުރުމަށް އަޅުގަނޑުމެންނަށް ފަންޑިން އެޖެންސީތަކާއިއެކު، މަސައްކަތް ފެށިގެންދިޔ. އޭގެ ނަތީޖާއަކަށްވީ އައިއެސްޑީބީގެ ފަރާތުން މިފްކޯގެ ތަރައްގީއަށް ކުރަން ހުރި މަސައްކަތްތަކުގެ ތެރެއިން، އައްޑޫގެ ފިޝަރީސް ކޮމްޕްލެކްސް ހިމެނޭހެން، މި މަސައްކަތް ކުރެވޭނެ ފައިސާ ހަމަޖެހިގެން މިދިޔައީ މިދިޔަ ހަފްތާގައި.
މަސްވެރިކަމާބެހޭ ވަޒީރު އަހުމަދު ޝިޔާމް
މިއާއެކު ޝިޔާމް ވިދާޅުވީ، އައްޑޫ ފިޝަރީޒް ކޮމްޕްލެކްސްގެ މަސައްކަތް 2025 ވަނަ އަހަރުގެ ކުރީކޮޅު ފައްޓަވައި، އެ އަހަރު ނިމެން ވާއިރު ނުވަތަ އެންމެ ލަސްވެގެން 2026 ވަނަ އަހަރުގެ ކުރީކޮޅުގައި ނިންމާނެކަމަށެވެ.
ޝިޔާމް އިތުރަށް ވިދާޅުވީ، މިހާރު މި ފެސިލިޓީގައި ރައްކާކުރެވެނީ 1،500 ޓަނުގެ މަސްކަމަށާއި، ބްރައިން ކެޕޭސިޓީ ހުރީ 50 ޓަނުގައިކަމަށެވެ. ނަމަވެސް އިތުރު ކުރެވޭ ވަސީލަތްތަކާއެކު، އިތުރު 1،000 ޓަނުގެ މަސް ރައްކާކުރެވޭނެކަމަށާއި، ބްރައިން ފްރީޒިންއަށްވެސް 50 ޓަނު އިތުރުވެގެންދާނެކަމަށް ޝިޔާމް ވިދާޅުވިއެވެ. އަދި ދުވާލެއްގެ މައްޗަށް 500 ޓަނުގެ މަސް ގަނެވޭނެކަމަށް ވިދާޅުވިއެވެ.
މިކަމަށް ބޭނުންވާ ފައިނޭންސް ހަމަޖެއްސުމަށްޓަކައި އެހީތެރިވެދިން ވުޒާރާތަކަށް، ޚާއްސަކޮށް ފިނޭންސް މިނިސްޓަރަށް ޝިޔާމަ ޝުކުރު އަދާކުރެއްވިއެވެ. އަދި އެ ފިޝަރީޒް ކޮންޕްލެކްސް ބޮޑުވެގެން ދިޔުމަކީ އައްޑޫގެ މަސްވެރިކަމަށް ކުރެވޭނެ އެންމެ މުހިންމު ތަރައްގީގެ މަސައކަތް ކަންވެސް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
