ސަރުކާރުން، ހަރަދު ކުޑަކުރަން އަޅާ ފިޔަވަޅުތަކުގެ ސަބަބުން އަންނަ އަހަރުގެ ބަޖެޓުން 6.6 ބިލިއަން ރުފިޔާ ސަލާމަތް ކުރެވޭނެ ކަމަށް ބަޖެޓުގައި ފާހަގަކޮށްފި އެވެ.

މިއަދުގެ މަޖިލީހުގެ ޖަލްސާގައި، މާލީ ވަޒީރު މޫސާ ޒަމީރު ވަނީ އަންނަ އަހަރަށް ލަފާކުރާ 56.6 ބިލިއަން ރުފިޔާގެ ބަޖެޓް މަޖިލީހަށް ހުށަހަޅުއްވައިފައެވެ.

އެ ބަޖެޓްގައި ވަނީ ޚަރަދު ކުޑަކުރަން ގިނަ ފިޔަވަޅުތަކެއް އެޅުމަށް ވަނީ ހިމަނާފައެވެ. 

އެގޮތުން ހަރަދު ކުޑަކުރަން އަޅާނެ ކަމަށް ބަޖެޓުގައި ބުނެފައިވާ ފިޔަވަޅުތަކަކީ: 

1-ސަބްސިޑީގެ އެހީ ބޭނުންވާ ފަރާތްތަކަށް ސީދާ ގޮތެއްގައި ސަބްސިޑީ ފޯރުކޮށްދޭ ނިޒާމަށް ބަދަލުކުރުން 

2-އާސަންދަ ނިޒާމް މުރާޖައާކޮށް މިހާރަށް ވުރެ ވަށާ ޖެހޭ ފުރިހަމަ އަދި ދެމެހެއްޓެނިވި ނިޒާމަކަށް ބަދަލުކުރުން

3-ތެލުގެ އަގު ބޮޑުވުމުން މާލިއްޔަތަށް ކުރިމަތިވާ ގޮންޖެހުންތައް ކުޑަކުރަން ފިޔަވަޅުތަކެއް އެޅުން 

4-ދައުލަތުން ފޯރުކޮށްދޭ ޕެންޝަންތައް ތަކުރާރު، އިސްރާފު ނުވާނެހެން މުރާޖައާކުރުން

5-ސަރުކާރު ކުންފުނިތައް ނުވަތަ އެސްއޯއީތައް އިސްލާހުކުރުން

ޚަރަދު ކުޑަ ކުރުމަށް އަޅަން ނިންމާފައިވާ ފިޔަވަޅުތަކުގެ އިތުރުން އާމްދަނީ އިތުރު ކުރުމަށްވެސް ގިނަ ކަންކަން ބަޖެޓްގައި ހިމަނާފައިވާއިރު، މި ފިޔަވަޅުތަކުގެ ސަބަބުން 4.9 ބިލިއަން ރުފިޔާ އަންނަ އަހަރު ދައުލަތަށް ލިބޭނޭ ކަމަށް ބަޖެޓުގައި ވަނީ ލަފާކޮށްފަ އެވެ.

އެގޮތުން، އާމްދަނީ އިތުރުކުރަން ހުށަހަޅާ ކަންކަމަކީ: 

1. ސިނގިރޭޓާއި ބިޑިން ނަގާ އިމްޕޯޓް ޑިއުޓީ ބޮޑުކުރުން

2. އެއާޕޯޓް ޓެކުހާއި ފީތައް ދެގުނަ ބޮޑުކުރުން

3. ގްރީން ޓެކުހުގެ ރޭޓްތައް ބޮޑުކުރުން

4. އަމިއްލަ ފަރާތްތަކުން ހިންގާ ބިން ހިއްކުމުގެ މަޝްރޫއުތަކަށް ނަގާ ވެއްޔަށް ޑްރެޖިން ފީއެއް ނެގުން

5. ޓީޖީއެސްޓީ ރޭޓް މަތިކުރުން

6. ޓީޖީއެސްޓީ ޑެސްޓިނޭޝަން ބޭސްޓް ޓެކްސްއަކަށް ބަދަލުކުރުން

7. ފްރީކުއަންސީ ސްޕެކްޓްރަމް ޗާޖެއް ނެގުން

މި ފިޔަވަޅުތަކުގެ ތެރެއިން ބައެއް ފިޔަވަޅުތައް ތަންފީޒު ކުރަން ގާނޫނުތަކަށް ގެންނަން ޖެހޭ ބަދަލުތައް މަޖިލީހަށް ހުށަހަޅާ މިހާރު ވަނީ ނިމުމަކާ ހަމައިގަ އެވެ.