މަސައްކަތުގައާއި ސްކޫލްތަކުގައި އާޓިފިޝަލް އިންޓެލިޖެންސް (އޭއައި) ބޭނުންކުރުމުގެ ސަބަބުން، އަންނަ މަދު އަހަރުތަކެއްގެ ތެރޭގައި ގިނަ މީހުންގެ ލިޔުންތެރިކަމުގެ ހުނަރު ގެއްލިގެންދާނެކަމުގެ އިންޒާރު ކޮމްޕިއުޓަރ ސައިންޓިސްޓަކު ދީފިއެވެ.

ސްޓާޓްއަޕް އެކްސެލެރޭޓަރ އަދި ވެންޗަރ ކެޕިޓަލް ފާމެއް ކަމަށްވާ ވައި ކޮމްބިނޭޓަރގެ ކޯފައުންޑަރ އަދި ތަޖުރިބާކާރު އިންވެސްޓަރ ޕޯލް ގްރަހަމް މިފަދައިން ވިދާޅުވެފައިވަނީ ފާއިތުވި ހަފްތާގައި އޭނާގެ ވެބްސައިޓްގައި ޝާއިޢުކުރި މަޒުމޫނެއްގައެވެ.

އިނގިރޭސި-އެމެރިކާގެ ސައިންޓިސްޓް އަދި ލިޔުންތެރިއެއްވެސް ކަމަށްވާ ޕޯލް ގްރަހަމް ވިދާޅުވި ގޮތުގައި މިއީ ވަރަށް ބޮޑު މައްސަލައެކެވެ. އެއީ ލިޔުމަކީ ވިސްނުން ކަމަށްވާތީއެވެ.

"ރަނގަޅަށް ލިޔަން ވާނަމަ، ހުޅުވާލެވިފައިވާ ސިކުނޑިއަކުން ރަނގަޅަށް ވިސްނަން ޖެހޭ. އަދި އެފަދައިން ވިސްނުމަކީ އުނދަގޫ ކަމެއް. އެހެންވެ ގިނަ މީހުންނަށް ލިޔަން އުނދަގޫ ވަނީ.“ ޕޯލް ގްރަހަމް ވިދާޅުވިއެވެ.

ނަމަވެސް، ޓެކްނޮލޮޖީގެ ކުރިއެރުމާއެކު މީހުންނަށް ލިޔުމުގެ މަސައްކަތް އޭއައި އަށް ހަވާލުކުރެވޭ ގޮތް ވަނީ ވެފައެވެ. އެހެންކަމުން، ލިޔަން ދަސްކުރުމުގެ ބޭނުމެއް ނެތްކަމަށާއި، އެހެން މީހަކު ލައްވާ ލިޔުވުމުގެ ނުވަތަ ކޮޕީކުރުމުގެ ބޭނުމެއްވެސް ނެތްކަމަށް ގްރަހަމް ވިދާޅުވިއެވެ.

"އާންމު ގޮތެއްގައި ޓެކްނޮލޮޖީއާ ބެހޭ ގޮތުން ކަންކަން ލަފާކުރުމަށް އަޅުގަނޑު ފަސްޖެހެން. އެކަމަކު މިކަމާ ބެހޭ ގޮތުން އަޅުގަނޑަށް ޔަޤީންކަމާއެކު ބުނެވޭނެ.  ދެތިން ޑިކޭޑްގެ ތެރޭގައި ލިޔަން ދަންނަ މީހުން މަދުވާނެ،" ގްރާހަމް ވިދާޅުވިއެވެ.

"ޓެކްނޮލޮޖީ ތަރައްޤީވުމާއެކު ބައެއް ހުނަރުތައް ގެއްލިގެން ދިއުމަކީ އާންމު ކަމެއް. މިހާރު ދަނގަޑު މަސައްކަތްކުރާ މީހުން މަދުވެފައިވާއިރު، އެއީ މައްސަލައެއް ކަމަކަށް ނުފެނޭ،" އޭނާ ވިދާޅުވިއެވެ.

ނަމަވެސް މީހުންނަށް ލިޔަން ނޭނގުމަކީ "ނުރައްކާތެރި" ކަމެއްކަމަށް އޭނާ ވިދާޅުވިއެވެ.

"ލިޔަން ދަންނަ މީހުންނާއި ނުދަންނަ މީހުންގެ މައްޗަށް ބެހިފައިވާ ދުނިޔެއަކީ އަޑުއިވޭ ވަރަށްވުރެ ނުރައްކާތެރި ދުނިޔެއެއް. އެއީ ވިސްނޭ މީހުންނާއި ނުވިސްނޭ މީހުންގެ ދުނިޔެއަކަށް ވާނެ،" ގްރާހަމް ވިދާޅުވިއެވެ.

މިއީ ކުރިން ދުވަހަކު ވެސް ދިމާވެފައިވާ ކަމެއް ނޫންކަމަށް އޭނާ ފާހަގަކުރެއްވިއެވެ. އޭނާ އިޝާރާތްކުރެއްވީ ސިނާޢީ އިންޤިލާބުގެ ކުރީގެ ދުވަސްވަރަށެވެ.

"އެ ދުވަސްވަރު ގިނަ މީހުން އަދާކުރާ ވަޒީފާތަކުގެ ސަބަބުން އެމީހުންވެފައިވަނީ ވަރަށް ބާރުގަދަ ބުންވަރު ހުންނަ ބަޔަކަށް. މިހާރުވެސް އެފަދަ ބަޔަކަށްވާން ބޭނުންވާ ނަމަ، ކަސްރަތު ކުރެވޭނެ. އެހެންވީމާ، މިހާރުވެސް ވަރުގަދަ މީހުން އެބަތިބި،" ގްރާހަމް ވިދާޅުވިއެވެ.

އޭނާގެ ނަޒަރުގައި، ލިޔުންތެރިކަމަށްވެސް ވާނީ އެހެންނެވެ.

"ވިސްނުންތޫނު ލިޔަން އެނގޭ މީހުން ތިބޭނެ، އެކަމަކު އެއީ ހަމައެކަނި އެކަމަށް ބޭނުންވާ މީހުން އެކަނި."

ޑިޖިޓަލް އެޑިޔުކޭޝަން ކައުންސިލުން ފަހުން ހެދި ސަރވޭއަކުން ދައްކާ ގޮތުގައި %86 ދަރިވަރުން އެމީހުންގެ ކިޔެވުމުގައި އާޓިފިޝަލް އިންޓެލިޖެންސް ބޭނުންކުރެއެވެ. މި ދިރާސާއިން ދައްކާ ގޮތުގައި %28 ދަރިވަރުން ލިޔުންތައް އަލުން ޢިބާރާތްކުރުމަށް ޓެކްނޮލޮޖީ ބޭނުންކުރާއިރު، %24 ދަރިވަރުން ފުރަތަމަ ޑްރާފްޓް ހެދުމަށް އާޓިފިޝަލް އިންޓެލިޖެންސް ބޭނުންކުރެއެވެ.