ފަލަސްތީނުގެ ޣައްޒާގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހިންގަމުންދާ ކެމްޕެއިންގެ ތެރެއިން ޕޯލިއޯ ވެކްސިން ދެމުންދިޔަ ކްލިނިކަކަށް ނިރުބަވެރި ޔަހޫދީ ފައުޖުން ހަމަލާދީފިއެވެ.

ޕޯލިއޯ ކެމްޕޭންގެ ދެވަނަ ބުރު ޣައްޒާގައި ފަށާފައިވާއިރު، ޑަބްލިއުއެޗްއޯ އިން ބުނީ، ކެމްޕޭން ފެށިތާ ގަޑިއިރު ތަކެއްގެ ތެރޭގައި، އުތުރު ޣައްޒާގައި ހުރި ހެލްތު ސެންޓަރަކަށް ހަމަލާދީފައިވާކަމުގެ ރިޕޯޓް ލިބުނުކަމަށާއި މި ހަމަލާގައި 4 ކުޑަކުދިން ހިމެނޭހެން ޖުމްލަ 6 މީހަކު ޒަހަމްވެފައިވާކަމަށެވެ.

ޔަހޫދީން ހަމަލާދިން ސަރަހައްދަކީ ހިއުމެނިޓޭރިއަން ޕޯޒް ނުވަތަ އާއްމުން ދިރިއުޅޭ ސަރަހައްދަކަށް ވާތީ ހަމަލާދިނުން މަނާކަމަށް ކަނޑައަޅާފައިވާ ސަރަހައްދެއްކަމަށް އެ ޖަމިއްޔާއިން ފާހަގަކުރިއެވެ.

އދ ގެ އުޅަނދަކަށް ވެސް ޔަހޫދީން ހަމަލާ ދީފައިވާއިރު، ޑަބްލިއުއެޗްއޯއިން ބުނީ، ހަމަލާތަކާއިއެކު ވެސް ޣައްޒާގައި މި ވެކްސިން ކެމްޕޭން ކުރިއަށްދާނެ ކަމަށެވެ.

އަމާޒަކީ ދެވަނަ ބުރުގައި 100،000 ކުޑަކުދިންނަށް މިވެކްސިން ގެ އެންމެ ފަހު ޑޯޒް ދިނުންކަމަށް ވެސް އެ ޖަމިއްޔާއިން ބުނެއެވެ.