އަދުގެ ސަރުކާރުން އަންނަނީ، ދިވެހިންނަށް ގެއްލިފައިހުރި ފައިސާއާއި، ދިވެހިންގެ މުދަލާއި ބައިތުލްމާލުން ކުރެވުނު ވައްކަންތަކުން ގެއްލިފައުވާ ފައިސާ ހޯދުމަށް އެކިއެކި ގާނޫނުތަކަށް ބަދަލު ގެންނަމުން ކަމަށް މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުޙައްމަދު (އިއްބެ ޖަނާބު) ވިދާޅުވެއްޖެއެވެ.

ދައުލަތުގެ މަގާމުތަކުގައި ތިބެ ހޯދާފައިވާ ނުޙައްގު މުއްސަނދިކަމުގެ މައްސަލަތައް ބެލުން ފަސޭހަވާ ގޮތަށް ގާނޫނަށް ބަދަލު ގެނައުމަށް މަޖިލީހަށް ހުށަހެޅިފައިވާ ބިލަށް ބަހުސް ކުރައްވަމުން، އިއްބެ ވިދާޅުވީ މީގެ ކުރިންވެސް އެކިއެކި މިނިވަން މުއައްސަސާ ތަކުގެ ބޭފުޅުންގެ މައްޗަށް ކޮރަޕްޝަންގެ ތުހުމަތުތައް ކުރެވިގެންދިޔަ ތަން މީގެ ކުރިން ފެނިފައިވާ ކަމަށެވެ. އެހެން ނަމަވެސް އެކަންކަން ބެލުނުތަން ފެނިފައިވާ ނުވާ ކަމަށެވެ. 

”މިއީ، ދިވެހިން ފާއިތުވި 400 އަހަރު ދިވެހިން އެދެމުން އައި ކަމެއް. މުހައްމަދު ފަރީދުގެ ޒަމާނުން ފެށިގެން، މިއަދާއި ހަމައަށް، ބައިތުލް މާލަށް އަތް ބާނައި، ބައިތުލްމާލުން އެކިއެކި ވެރިކަން ނިމިގެން ދިޔައިރުގައި ވައްކަން ކުރި ކަމުގެ ތުހުމަތު މިއޮތީ“ އިއްބެ ވިދާޅުވުއެވެ. 

މިއާއެކު އިއްބެ ވިދާޅުވީ، ރައްޔިތުންގެ މުދަލުން ވައްކަން ކުރާ މީހުންނަކީ ދައުލަތުގެ ދުޝްމަނުން ކަމަށެވެ. އަދި ރައްޔިތުންގެވެސް ދުޝްމަނުން ކަމަށެވެ. 

އިއްބެ ވިދާޅުވިގޮތުގައި، ހުރިހާ ”ޕާޓީތަކެއްގައިވެސް ތިބޭ ވަގުންނަކީ އެއްބަޔަކު އަނެއް ބަޔަކާ ގުޅި ލާމެހިފައިވާ“ ބައެކެވެ. އަދި ވެރިކަންތައް ބަދަލުވި ނަމަވެސް ފަރާތްތަކުގެ މެދުގައި އޮންނަ ގުޅުމާއި ވައްކަން ކުރުމުގެ ރޫހަކީ އާދަޔާ ޚިލާފަށް ގަދަޔަށް އޮންނަ އެއްޗެއް ކަމަށެވެ. 

ކަންމިހެން ހުރުމުން، ގާނޫނު ތަކަށް ގެންނަ އިސްލާހުތަކުގެ ހަގީގީ މަގުސަދަކީ ސަރުކާރާއި އަދި އެހެންވެސް ޕާޓީ ތަކުގައި ތިބި އެފަދަ ފަރާތްތަކާމެދު ތަހުގީގު ހިންގައި ފިޔަވަޅު އެޅިގެން ދިޔުން ކަމަށް އޭނާ ވިދާޅުވިއެވެ.