ކޮންޓިންޖެންސީ ބަޖެޓުން ކައުންސިލްތަކަށް 699.6 މިލިއަން ރުފިޔާ ހަމަޖައްސައިދިނުމަށް މާލީ ވަޒީރު މޫސާ ޒަމީރު އެދިވަޑައިގެންފިއެވެ.
މި ބަދަލު ގެންނަން ނިންމާ އެކަން ރައްޔިތުންގެ މަޖިލީހަށް ވަޒީރު ޒަމީރު އަންގަވާފައިވާއިރު، މި ސިޓީ މިއަދުގެ ޖަލްސާގައި އިދާރީ މޭޒުން ވަނީ ހުށަހަޅުއްވައިދެއްވާފަ އެވެ.
މި ސިޓީގައި ވަޒީރު ޒަމީރު ވިދާޅުވީ، 2025 އަހަރަށް ލަފާކުރާ ބަޖެޓުގައި ކައުންސިލްތަކަށް ދޫކުރާ ރާވާފައިވާ ބްލޮކް ގްރާންޓް އަދަދަކީ 1.4 މިލިއަން ރުފިޔާ ކަމަށެވެ.
ކައުންސިލްތަކަށް ދޫކުރާ ބްލޮކް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި މިހާރު ކަނޑައަޅާފައިވާ މިންގަނޑުގައި ހިފެހެއްޓުމަށް ނިންމާފައިވާކަން ފާހަގަކުރައްވަމުން ވަޒީރު ވިދާޅުވީ، މި ބަދަލު ގެންނަން ބޭނުންވާނެ ކަމަށް ލަފާކުރާ 699.6 މިލިއަން ރުފިޔާ ބަޖެޓްގެ ޖުމްލަ އަދަދު އިތުރު ނުވާ ގޮތަށް ކޮންޓިންޖެންސީ ބަޖެޓުން ބަދަލުކުރާ ގޮތަށް ހަމަޖައްސައިދިނުމަށް އެދިވަޑައިގަންނަވާ ކަމަށެވެ.
"މި ބަދަލު ގެންނަން ބޭނުންވާނެ ކަމަށް ލަފާކުރާ 699.6 މިލިއަން ރުފިޔާ ބަޖެޓްގެ ޖުމްލަ އަދަދު އިތުރު ނުވާ ގޮތަށް ކޮންޓިންޖެންސީ ބަޖެޓުން ބަދަލުކުރާ ގޮތަށް ހަމަޖައްސަވާ ދެއްވުމަށް އެދި ދަންނަވަން،"
ވަޒީރު ޒަމީރު ފޮނުއްވި ސިޓީގައިވެއެވެ.
މިއާއިއެކު މަޖިލީހުން ވަނީ މި ސިޓީ ބަޖެޓް ދިރާސާކުރާ ކޮމިޓީއަށް ފޮނުވާފައެވެ.
Advertisement
This content is created and paid for by advertisers and does not involve Voice Journalists
