އެމެރިކާގައި މިހާރު ކުރިއަށްދާ ރިޔާސީ އިންތިހާބުގައި ވާދަކުރާ އިދިކޮޅު ޕާޓީ، ރިޕަބްލިކަންސް އިން އެމެރިކާގެ ސެނެޓް ގެ މެޖޯރިޓީ ހޯދައިފިއެވެ.

ވެސްޓް ވާޖީނިއާ އާއި އޮހައިއޯ އިން މެޖޯރިޓީ ލިބުމާއިއެކު، ރިޔާސީ އިންތިހާބުގެ ކެނޑިޑޭޓް އަދި އެގައުމުގެ ކުރީގެ ރައީސް ޑޮނަލްޑް ޓްރަމްޕްގެ ޕާޓީއަށް އަންނަ އަހަރު އެގައުމުގެ ކޮންގްރެސްގެ އެއް ޗެމްބަރުގެ ކޮންޓްރޯލް ލިބޭނެކަން ވަނީ ކަށަވަރުވެފައެވެ.

އެމެރިކާގެ ސެނެޓް ކާމިޔާބުކުރުމަށް 50 ގޮނޑި ބޭނުންވާއިރު، އަންނަ އަހަރުގެ ކޮންގްރެސްގައި ރިޕަބްލިކަންސް އަށް 51 ގޮނޑި އަދި ޑިމޮކްރެޓްސް އަށް 42 ގޮނޑި ލިބޭނެކަމަށް ވަނީ ޔަގީން ކުރެވިފައެވެ.

މިއާއިއެކު، ޓްރަމްޕް ވެރިކަމަށް ހޮވިއްޖެނަމަ ކޮންޒަވޭޓިވް ފަނޑިޔާރުންނާއި ސަރުކާރުގެ އެހެން މުވައްޒަފުން އައްޔަން ކުރުމަށް ޓްރަމްޕަށް އެހީތެރިވެދިނުމަށް ވަރަށް ބޮޑު ލުޔަކަށް ވެގެންދާނެއެވެ. މިއާއި ޚިލާފަށް ޓްރަމްޕާއި ވާދަކުރާ، އެގައުމުގެ ނައިބު ރައީސާ ކަމަލާ ހެރިސް ކާމިޔާބު ވެއްޖެނަމަ، އެކަމަނާގެ އެޖެންޑާ ތަންފީޒު ކުރުމުގައި ބޮޑެތި ގޮންޖެހުންތަކަކާއި ކުރިމަތިލާން ޖެހިވަޑައިގަންނަވާނެއެވެ.

އެމެރިކާގެ ސެނެޓް ރިޕަބްލިކަންސް އިން ކާމިޔާބު ކުރިިއިރު، އެގައުމުގެ އައު ރައީސް ހޮވުމަށް ކުރިއަށްދާ އިންތިހާބުގެ ނަތީޖާ މިހާތަނަށް ދައްކާގޮތުން ކުރީގައި އުޅެނީ ޓްރަމްޕެވެ. މިގޮތުން ޓްރަމްޕަށް 247 އިލެކްޓޯރަލް ވޯޓު ލިބިފައިވާއިރު، ހެރިސް އަށް ލިބިފައިވަނީ 210 އިލެކްޓޯރަލް ވޯޓެވެ.

އެގައުމުގެ ރައީސް ކަމަށް އިންތިހާބުވުމަށް 270 އިލެކްޓޯރަލް ވޯޓް ބޭނުންވާއިރު، މި ނަތީޖާއާއި އެކު ޓްރަމްޕް އަނެއްކާވެސް އެމެރިކާގެ ރައީސް ކަމަށް އައްޔަނުވުމުގެ ފުރުސަތު ބޮޑުކަމަށް ގިނަ ބަޔަކު އަންނަނީ ލަފާކުރަމުންނެވެ.