އިންޓަރނޭޝަނަލް ޖައްވީ ސްޓޭޝަނުގައި ތާށިވެފައި ތިބި ދެ އެސްޓަނޯޓުންގެ ތެރެއިން ސުނީތާ ވިލިއަމްސްގެ ސިއްހީ ހާލަތާ ގުޅޭގޮތުން ސުވާލު އުފެދިއްޖެއެވެ.

އުމުރުން 59 އަހަރުގެ ސުނީތާގެ ސިއްހީ ހާލަތާ ގުޅޭގޮތުން ސުވާލުއުފެދިފައިމިވަނީ، މިފަހަރުން މިފަހުން ޖައްވީ ސްޓޭޝަނަށް ދިޔަ ދެ އެސްޓަރނޯޓުންކަމަށްވާ ބެރީ ވިލްމޯ އަދި ސުނީތާ ވިލިއަމްސްގެ އެންމެ ފަހުން ނަގާފައިވާ ފޮޓޯތައް އާއްމުވުމާ ގުޅިގެންނެވެ. ޖައްވީ ސްޓޭޝަންގައި ތާށިވެ، އެ ދެ އެސްޓަރނޯޓުން ބިމަށް ނާދެވިފައިތިބޭތާ މިހާރު ހަތަރުމަހަށްވުރެ ގިނަ ދުވަސް ވެއްޖެއެވެ.

ބޮއިން ސްޓާލައިނާގައި އެ ދެ އެސްޓަރނޯޓުން ބައިނަލްއަގްވާމީ ޖައްވީ ސްޓޭޝަނަށް ފޮނުވާލީ މިއަހަރުގެ ޖޫންމަހުގެ 5 ވަނަ ދުވަހުއެވެ. އޭރު ތާވަލްކޮށްފައި އޮތީ 8 ދުވަހުގެ ތެރޭގައި އެނބުރި ބިމަށް އަންނަ ގޮތަށެވެ. ނަަމަވެސް އެ ދެ އެސްޓަރނޯޓުންނަށް އާދެވިފައިނުވަނީ، ދަތުރުކުރި އުޅަނދަށް ދިމާވި ޓެކްނިކަލް މައްސަލަ ހައްލު ނުކުރެވިގެންނެވެ. 

އެމެރިކާގެ ޖައްވީ އިދާރާއި ބުނާގޮތުގައި ކަންކަން މިހާރު ގޮސްފައިވާ ހިސާބަށް ބަލާއިރު، އެންމެ އަވަސްވެގެންވެސް އެ ދެ އެސްޓަރނޯޓުން އެނބުރި ބިމަށް އާދެވޭނީ އަންނަ އަހަރުގެ ފެބުރުއަރީމަހުގެ ތެރޭގައެވެ. ނާސާއިން ބުނެފައިވަނީ، އެ ދެ އެސްޓަރނޯޓުންނަށް ވާވަރަށް ޖައްވީ ސްޓޭޝަނުގެ ސްޓޮކްގައި ކާނާގެ ބާވަތްތަކާއި ފެނާއި އެނޫންވެސް ތަކެތި ހުންނާނޭ ކަމަށެވެ.

ނަމަވެސް މިފަހުން ނާސާއިން އާއްމުކުރި ފޮޓޯތަކުގައި ސުނީތާ މާބޮޑަށް އަނަރޫފަވެފައި ހުރުމުން އެސްޓަރނޯޓުންގެ ސިއްހީ ހާލަތާމެދު ކަންބޮޑުވާކަމަށް ގިނަ ފަރާތްތަތަކުން ވަނީ ބުނެފައެވެ. މިކަމާ ގުޅޭގޮތުން ނާސާގެ އޮފިޝަލަކު ވިދާޅުވެފައިވަނީ، ޖައްވުގައި ތާށިވެފައިތިބި އެސްޓަރނޯޓުންގެ ސިއްހީ ކަންކަމަކީ މިވަގުތު އެ އިދާރާއިން އެންމެ އިސްކަންދޭ އެއް ކަންތައް ކަމަށާއި، ސުނީތާގެ ހާލަތު ގަވާއިދުން ބަލަމުން އަންނަ ކަމަށެވެ. 

ބިމާއި ހިލާފަށް ޖައްވުގައި ގާއިމްވެތިބޭއިރު، އާއްމު މިންގަނޑާ ހިލާފަށް ހަށިގަނޑު ދުޅަހެޔޮކަންމަތީ ބެހެއްޓުމަށްޓަކައި ބޭނުންކުރާ ކެލަރީގެ އަދަދު އިތުރުކުރަންޖެހެއެވެ. އެހެން ނޫންނަމަ ބަރުދަން ލުއިވުމާއި ހަމުގެ މައްސަލަތަށް ވަރަށް އަވަހަށް ދިމާވެއެވެ. ހާއްސަ ގޮތެއްގައި މިކަމުގައި އެންމެ އަވަހަށް ބަދަލުތައް އަންނަން ފަށަނީ އަންހެނުންނަށް ކަމަށް ނާސާގެ ހޯދުންތަކުގައި ބަޔާންކޮށްފައި ވެއެވެ. 

ނާސާގެ މިޝަނެއްގައި މިފަހަރު އިންޑިއާގެ ދަރިކޮޅަށް ނިސްބަތްވާ ސުނީތާ ޖައްވަށް ދިޔައީ ޕައިލެޓެއްގެ ގޮތުގައެވެ. އަނެއް އެސްޓަރނޯޓް ބެރީއަކީ ކޮމާންޑަރެވެ.

މިފަހަރު ޖައްވީ ސްޓޭޝަނަށް ދިއުމަށް ދަތުރު ފެށުމުގެ ކުރިންވެސް އެތައް ފަހަރަކު ބޮއިންގެ ސްޓާލައިނާގައި މައްސަލަތައް ޖެހުނެވެ. ނަމަވެސް އެންމެފަހުން ސްޓާލައިނާ ފުރުވާލީ ޖެހުނު މައްސަލަތައް ހައްލުކޮށްގެންނެވެ.