އިޒްރާއީލް ޕާސްޕޯޓް މަނާކުރާ ބިލުގެ މަސައްކަތް މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީއަށް މިއަދު ހުށަހަޅާފައިވާއިރު، އެންމެބޮޑު އިސްކަމެއްދޭނީ ބިލުގެ މަސައްކަތް އަވަހަށް ނިންމުމަށްކަމަށް އެ ކޮމިޓީގެ މުގައްރިރުގެ ނައިބު، އިނގުރައިދޫ ދާއިރާގެ މެމްބަރު އިބްރާހިމް ފަލާހް ވިދާޅުވެއްޖެއެވެ.

މިކަމާ ގުޅިގެން ވޮއިސްއަށް މައުލޫމާތު ހިއްސާކުރަމުން މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީގެ މުގައްރިރުގެ ނައިބު އިނގުރައިދޫ ދާއިރާގެ މެމްބަރު އިބްރާހިމް ފަލާހް ވަނީ އިޒްރާއީލް ޕާސްޕޯޓް މަނާކުރުމުގެ މައްސަލަ ކޮމިޓީއަށް މިއަދު އެޖެންޑާކޮށްފައި ވާކަމަށެވެ.

ފަލާހް ވިދާޅުވީ އެންމެ މުހިއްމު ކަމަކަށް އޮންނާނީ ބިލްގެ މަސައްކަތް ނިންމާނޭ ތާރީހެއް ކަނޑައެޅުން ކަމަށާއި، އެއާއެކު ކޮމިޓީގައި މަޝްވަރާކުރެވިގެން ކަމާބެހޭ ފަރާތްތަކުގެ ހިޔާލު ހޯދުމަށް ފޮނުވާނޭކަމަށެވެ.

ފަލާހް ވިދާޅުވީ ސަރުކާރުންވެސް އިޒްރާއީލް ޕާސްޕޯޓް މަނާކުރުމުގެ ބިލް އަވަހަށް ނިންމުމަށް އަމާޒުހިފާފައިވާއިރު، މިކަން އަވަހަށް ނިންމުމަށްޓަކައި ކުރަންޖެހޭ މަސައްކަތްތައް ކުރަމުންދާނޭކަން ފަލާހްވަނީ ފާހަގަކުރައްވާފައެވެ.

އިސްރާއީލުގެ ޕާސްޕޯޓް މަނާކުރަން ޤާނޫނަށް ބަދަލުގެންނަން ވަޒީރުންގެ މަޖިލީހުން ނިންމާފައިވަނީ މިއަހަރުގެ ޖޫންމަހުގެ ތެރޭގައެވެ. އިސްރާއީލް ޕާސްޕޯޓް މަނާކުރާ ބިލް މަޖިލީހަށް ވައްދާފައިވަނީ އެމްޑީޕީގެ މެމްބަރު މީކާއީލެވެ. 

އިމިގްރޭޝަންޤާނޫނަށް މިހާރު ހުށަހަޅާފައި އޮތް އިސްލާހުގައި ވާގޮތުން އިޒްރާއީލް ޕާސްޕޯޓް އޮންނަ އެހެން ޤައުމުތަކުގެ މީހުންނަށްވެސް ރާއްޖެ އައުމުގެ ފުރުސަތު ގެއްލިގެންދާނެއެވެ.

މިކަމާ ގުޅިގެން އެޓާނީ ޖެނަރަލް އަހުމަދު އުޝާމް ވިދާޅުވެފައި މިހާރު ބިލް އޮތްގޮތަށް ފާސްކޮށްފިނަމަ އެކަމުގެ ސަަބަބުން ރާއްޖެއަށް އުނދަގޫތަކެއް ކުރިމަތިވެދާނެ ކަމަށާއި، އިޒްރާއީލް ޕާސްޕޯޓް އޮންނަ އެހެން ޤައުމުތަކުގެ މީހުން އިސްތިސްނާކުރަން ޖެހޭ ކަމަށެވެ. ސަބަބަކީ އިޒްރާއީލް ޕާސްޕޯޓްގައި އަރަބިންނާއި ފަލަސްތީނު މީހުންވެސް އުޅޭތީއެވެ.