އިޒްރޭލުގެ ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އިމިގްރޭޝަން ގާނޫނަށް ހުށަހަޅާފައިވާ އިސްލާހުގެ މަސައްކަތް ކުރިއަށް ނުދާ ކަމަށް ބުނެ އެމްޑީޕީން ރައްޔިތުންގެ މަޖިލީހަށް މިއަދު ގަރާރެއް ހުށަހަޅައިފި އެވެ.

އެމްޑީޕީގެ ފަރާތުން މި ގަރާރު މަޖިލީހަށް ހުށަހަޅުއްވާފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ.

އެ ގަރާރުގައި މެންބަރު ވިދާޅުވީ، ބިލު ހުށަހެޅި ދުވަހު ވަޒީރުންގެ މަޖިލީހުގެ ބައްދަލުވުމުގައި ވެސް އިޒްރޭލް މީހުން ރާއްޖެ އެތެރެވުން މަނާ ކުރުމަށްޓަކައި ގާނޫނު އިސްލާހު ކުރުމަށް ނިންމާފައިވާކަން ސަރުކާރުން އިއުލާން ކޮށްފައިވާ ކަމަށެވެ.

އެހެންނަމަވެސް އެކަމަށް އަމަލީ ސިފައެއް ގެންނަން ސަރުކާރުން އެއްވެސް މަސައްކަތެއްކޮށްފައެއް ނުވާ ކަމަށާ، ބިލުގެ މަސައްކަތް ކުރިއަށް ނުގޮސް ކޮމެޓީގައި އޮންނަތާ ހަތަރު މަހަށް ވުރެ ގިނަ ދުވަސް ވެފައިވާ ކަން ފާހަގަކުރެއްވިއެވެ.

މިއާއެކު އެ ގަރާރުގައި މެންބަރު ވިދާޅުވީ، ސަރުކާރުގެ އަގުލަބިއްޔަތު ހިނގަމުން މިދާ މަޖިލީހަށް ލިބިފައިވާ ކަމަށާ، އަދި ސަރުކާރުން އެ ހިނދަކަށް ބޭނުންވާ ކަމެއް ބޭނުންވާ ގޮތަށް މަޖިލީހުގެ ތެރެއިން ނިންމަމުން ގެންދާ ކަމަށެވެ.

އެގޮތުން ދައުރުން ބޭރުން ޖަލްސާތައް ބާއްވައިގެން ވެސް ބައެއް ބިލުތައް ފާސްކޮށްފައިވާކަން ފާހަގަކުރެއްވިއެވެ.

"މުޅި އިސްލާމީ އުއްމަތަށް އިސްރާއީލުން ޖައްސަމުން މިދާ ގިލަންވެރިކަމާއި އާފާތް ކުށްވެރިކޮށް އަޅުގަނޑުމެން އެކަމާއި ކަނޑައެޅިގެން ދެކޮޅުވެރިކަން ހާމަކޮށްދިނުމަށްޓައި ކޮންމެހެން ކުރަން ޖެހޭ ކަމެއްގެ ގޮތުން އިޒްރޭލު ޕާސްޕޯޓް މިހާރުން މިހާރަށް މަނާކުރުމަށްޓަކައި ގާނޫނު ނަމްބަރު 1/2007 (ދިވެހިރާއްޖޭގެ އިމިގްރޭޝަން ގާނޫނު)އަށް އިސްލާހު ގެނައުމަށް ހުށަހަޅައިފައިވާ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވައިލުމަށްޓަކައި މި ގަރާރު ހުށަހެޅީމެވެ،" މުހައްމަދު އިބްރާހީމްގެ ގަރާރުގައި ވިދާޅުވެފައިވެއެވެ.

ހައްދުފަހަނައަޅާފައިވާ އިޒްރޭލުން ފަލަސްތީނުގައި ހިންގަމުންދާ ޤަތުލު ޢާއްމަށް 400އަށްވުރެ ގިނަ ދުވަސް ވެފައިވާއިރު، އެކަމާއި ގުޅިގެން އިޒްރޭލު ޕާސްޕޯޓް މަނާކުރުމަށް ގޮވާލާ އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ބިލު ހުށަހެޅުއްވީ މީގެ ފަސް މަސް ކުރިން ޖޫން މަހު 10ގަ އެވެ.

އެފަހުން އެ ބިލުގެ މަސައްކަތް ކުރިއަށް ނުގޮސް ސަލާމަތީ ހިދުމަތްތަކާ ބެހޭ 241 ކޮމިޓީގައި އޮތް އިރު، އެ ކޮމިޓީން ވަނީ އެ ބިލުގެ ދިރާސާއަށް ފުރަތަމަ ކޮމެޓީ ބައްދަލުވުން މިއަދު ހެނދުނު 9:30 އަށް ތާވަލްކޮށްފަ އެވެ. 

އިޒްރޭލު ޕާސްޕޯޓް މަނާ ކުރުމަށް ނިމިދިޔަ އެމްޑީޕީ ސަރުކާރުގައި ވެސް އޭރުގެ އިދިކޮޅުން ގޮވާލިއެވެ. ނަމަވެސް، އޭރު އެ ސަރުކާރާއި އެމްޑީޕީ މެޖޯރިޓީ އޮތް މަޖިލީހުން އެ މައްސަލާގައި އެއްވެސް ފިޔަވަޅެއް އަޅާފައެއް ނުވެއެވެ.