އިންޑިއާގެ ހުޅަނގުއުތުރުގައި އޮންނަ އޮންނަ ސްޓޭޓެއް ކަމަށްވާ މަނިޕޫރުގައި ފުލުހުންގެ އިދާރާއަކަށް ހަމަލާދޭން އުޅުނު ހަތިޔާރު އެޅި ބަޔަކާއި ސަލާމަތީ ބާރުތަކާއި ދެމެދު ބަދަލުކުރި ހަމަލާތަކެއްގައި 10 މީހުން މަރުވެއްޖެއެވެ.

ހޯމަ ދުވަހުގެ ހަމަލާދިން މީހުންނަކީ "ހަތިޔާރު އެޅި ހަނގުރާމަވެރިން" ކަމަށް ސްޓޭޓް ޕޮލިހުން ނެރުނު ބަޔާނެއްގައި ބުނެފައިވާއިރު،  ސަލާމަތީ ބާރުތަކާއި ފުލުހުން ވަރުގަދައަށް ރައްދުދީ ގާތްގަނޑަކަށް 45 މިނެޓުގެ ވަރުގަދަ ބަޑިޖެހުމަށް ފަހު ހާލަތު ކޮންޓްރޯލް ކުރިކަމަށް ވެސް ބަޔާނުގައި ވެއެވެ.

މި ހާދިސާގައި ސެކިއުރިޓީ އޮފިސަރަކަށް ސީރިއަސް އަނިޔާތަކެއް ލިބިފައިވާ ކަމަށް އެގައުމުގެ ފުލުހުން މައުލޫމާތުދެއެވެ.

Advertisement

މަނިޕޫރުގެ ޖިރިބާމް ޑިސްޓްރިކްޓްގެ ޑެޕިއުޓީ ކޮމިޝަނަރު ކްރިޝްނާ ކުމާރު ވިދާޅުވީ، އުމުރުން 31 އަހަރުގެ ކުކިސް ދަރިކޮޅަށް ނިސްބަތްވާ އަންހެނަކު އަންދާލައި މަރާލުމާއި ގުޅިގެން އެ ސަރަހައްދުގައި ފާއިތުވި ދުވަސްތަކުގައި ހަމަނުޖެހުން ބޮޑުވެފައިވާކަމަށެވެ.

މަނިޕޫރުގައި މިދިޔަ އަހަރުން ފެށިގެން ހަމަނުޖެހުންތަކެއް ހިނގަމުން އަންނައިރު، އެ ސަރަހައްދުގެ ދަރިކޮޅެއް ކަމަށްވާ ކުކިސް އަށް ވެސް ލިބޭ ސަރުކާރުގެ ވަޒީފާތަކާއި ތައުލީމުގެ ހާއްސަ އިގްތިސާދީ ފައިދާތަކާއި ކޯޓާތައް މެއިޓީ ދަރިކޮޅަށް ވެސް އިތުރު ކުރުމަށް ކޯޓަކުން ސްޓޭޓް ސަރުކާރަށް އަމުރު ކުރުމުން މެއިޓީ ކޮމިއުނިޓީ އާއި ގަބީލާ ކުކީން އާއި މެދު މައްސަލަތައް ބޮޑުވެގެން ދިޔައެވެ.

3.2 މިލިއަން މީހުންގެ އާބާދީއެއް އޮންނަ އެ ސްޓޭޓް 2023 ވަނަ އަހަރުގެ މެއި މަހު ކުރިމަތިލުން ފެށުނު ފަހުން ވަނީ ދެ ސަރަހައްދަކަށް ބެހިފައިވާއިރު، އެ ސަރަހައްދުތައް ވަކިކޮށްފައިވަނީ ފެޑެރަލް ޕެރަމިލިޓަރީ ފޯސްތަކުން މޮނިޓަރ ކުރާ އިމަކުންނެވެ.

މިހާތަނަށް މި ހަމަނުޖެހުންތަކުގައި 250 މީހުން މަރުވެފައިވާއިރު، 6،000 އަށް ވުރެ ގިނަ މީހުންގެ ގެދޮރުވަނީ ގެއްލިފައެވެ.