ސިފައިންނާއި ފުލުހުންގެ މެޑިކަލް ވެލްފެއާ ސްކީމް އުވާލައި، ޕްރައިވެޓް އިންޝުއަރެންސް ނިޒާމަކަށް ބަދަލުކުރަން ސަރުކާރުން ނިންމައިފިއެވެ.

ސަރުކާރުން ގެޒެޓް ކުރި ދައުލަތުގެ ބަޖެޓްގައިވާގޮތުން، ސިފައިންނާއި ފުލުހުންގެ އާއިލާތަކަށް ޕްރައިވެޓް އިންޝުއަރެންސް ޕެކޭޖެއް ހަމަޖައްސައި ދައުލަތުން ހަރަދު ކުރަން ޖެހޭ މިންވަރު ކޮންޓްރޯލް ކުރަން ވަނީ ނިންމާފައެވެ.

މިހާރު މި އިންޝުއަރެންސްގައި ވަކި ލިމިޓެއް ނޯންނަކަން ފާހަގަކުރަމުން ސަރުކާރުން ބުނީ، ނަތީޖާއެއްގެ ގޮތުން ކޮސްމެޓިކް ޕްރޮސީޖާތަކާއި ބައެއް ކޮންޒިއުމަބަލްސްވެސް މި ސްކީމުގެ ތެރެއިން ލިބޭނެ އިންތިޒާމު ހަމަޖެހިފައި އޮންނަ ކަމަށެވެ.

Advertisement

އެހެންކަމުން ސަރުކާރުން ވަނީ އެ ސްކީމުގެ ބަދަލުގައި ފުލުހުންނާއި ސިފައިން، އަދި އެމީހުންގެ އާއިލާތަކަށް އެއް ހަމަަކޮށް ޕްރައިވެޓް އިންޝުއަރެންސް ހަމަޖައްސައި، އިންޝުއަރެންސް ހަމަޖެއްސުމަށް ހަރަދުކުރެވޭނެ ވަކި ލިމިޓެއް ކަނޑައެޅުމަށް ނިންމާފައެވެ.

އެހެންނަމަވެސް، ޕްރައިވެޓް އިންޝުއަރެންސްގެ ލިމިޓް ހަމަވުމަށްފަހު އާސަންދަ ނިޒާމުގެ ތެރެއިން ސިއްހީ ފަރުވާ ލިބޭނެ ކަމަށް ސަރުކާރުން ބުނެއެވެ.

ވަޒީފާ އަދާކުރުމުގެ ތެރެއިން ލިބޭ ހުރިހާ ގެއްލުމަކަށް ދައުލަތުން ފުރިހަމައަށް ހަރަދުކުރާނެކަމަށާއި، މި ބަދަލު އަންނަ އަހަރުގެ ކުރީކޮޅު ގެނައުމަށް މަސައްކަތް ކުރަމުންދާކަމަށް ސަރުކާރުން ބުނެއެވެ.