ސިޔާސީ ޕާޓީއެއް އުވައިލުމުން އެ ޕާޓީގެ ކުލައާއި ނަން އިތުރު ބަޔަކަށް ފަސް އަހަރުގެ މުއްދަތަކަށް ބޭނުންނުކުރެވޭ ގޮތަށް ގާނޫނަށް މާއްދާއެއް އިތުރުކުރަން ހުށަހަޅައިފި އެވެ.
ސަރުކާރުގެ ފަރާތުން ހުށަހަޅާފައިވާ ސިޔާސީ ޕާޓީތަކުގެ ގާނޫނަށް އިސްލާހު ގެނައުމުގެ ބިލު ދިރާސާކުރަން މިއަދު ބޭއްވި މުޅި މަޖިލީހުގެ ކޮމިޓީގައި ގާނޫނަށް މިގޮތަށް މާއްދާއެއް އިތުރުކުރަން ހުށަހެޅުއްވީ ޕީއެންސީއަށް ނިސްބަތްވެވަޑައިގަންނަވާ ފަރެސްމާތޮޑާ ދާއިރާގެ މެންބަރު އަޝްރަފު ރަޝީދެވެ.
މި އެގޮތުން އަޝްރަފް ހުށަހެޅުއްވި އިސްލާހް ތަކަކީ؛
ޕާޓީއެއް އުވައިލުމުން އެ ޕާޓީގެ ނަމާއި ނިޝާނާއި ކުލައާއި ސިއްކަ ފަދަ ޕާޓީގެ ރަމްޒުތައް އެ ޕާޓީއެއް އުވާލާ މުއްދަތުން ފެށިގެން ފަސް އަހަރުގެ މުހުލަތަކަށް ބޭނުންނުކުރެވޭ ގޮތަށް ގާނޫނުގައި މާއްދާއެއް އިތުރު ކުރުން
ފަސް އަހަރުން އެއްފަހަރު ގައުމީ ބައްދަލުވުމެއް ނުބޭއްވި ނަމަވެސް ޕާޓީ އުވައިނުލެވޭ ގޮތަށް ގާނޫނު ބަދަލުކުރުން
މުޅި މަޖިލީހުގެ ކޮމިޓީންވަނީ މި ދެ އިސްލާހު، ސިޔާސީ ޕާޓީ ތަކުގެ ގާނޫނަށް އިސްލާހް ގެނައުމުގެ ބިލުގައި ހިމެނުމަށް ފާސްކޮށްފަ އެވެ. އަދި މީގެ އިތުރުން ސިޔާސީ ޕާޓީތަކުގެ ގާނޫނަށް އިސްލާޙް ހުށަހަޅާފައިވާ ބިލު ވެސް މުޅި މަޖިލީހުގެ ކޮމެޓީން ވަނީ ފާސްކޮށްފަ އެވެ.
ސަރުކާރުން ސިޔާސީ ޕާޓީތަކުގެ ގާނޫނަށް ހުށަހަޅާފައިވާ އިސްލާހުގައިވާ ގޮތުން ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފި ނަމަ، އެ މީހަކު ޖޫރިމަނާ ކުރުމުގެ އިތުރުން، އެ މީހަކު ނިސްބަތްވާ ޕާޓީ 100،000ރ. އިން ޖޫރިމަނާ ކުރެވޭނެ އެވެ.
އިތުރަށް އެ ބިލުގައި އޮތީ ޕާޓީއެއްގެ ޕްރައިމަރީން ބަލިވާ ކެންޑިޑޭޓުންނަށް އަމިއްލަ ގޮތުން އިންތިހާބުތަކުގައި ވާދަނުކުރެވޭ ގޮތަށް 2016 ވަނަ އަހަރު ގާނޫނަށް އިތުރުކުރި މާއްދާ އުނިކުރުމަށް ހުށަހަޅާފައިވާ އިސްލާހެވެ.
Advertisement
This content is created and paid for by advertisers and does not involve Voice Journalists
