ފުލުހުންގެ ވެލްފެއާ ނިޒާމު އުވާލުމަށް ދެކެވެމުންދާ ވާހަކަތައް، ފުލުހުންގެ ތަރުޖަމާނު އަދި އެސިސްޓަންޓް ކޮމިޝަނަރ އޮފް ޕޮލިސް އަހުމަދު ޝިފާން ދޮގުކުރައްވައިފިއެވެ.

އަންނަ އަހަރުގެ ބަޖެޓްގައި ފުލުހުންގެ ވެލްފެއާ ނިޒާމް އިސްލާހުކުރުމަށް ނިންމުމާ ގުޅިގެން ބައެއް ފަރާތްތަކުން ދަނީ ފުލުހުންގެ ވެލްފެއާ ނިޒާމު އުވާލުމަށް ނިންމާފައިވާފަދަ މޭރުމަކުން ވާހަކަތައް ދައްކަމުންނެވެ.

މިކަމާ ގުޅިގެން ޝިފާން އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ފުލުހުންގެ ވެލްފެއާ ނިޒާމް އުވާލުމަށް ނިންމާފައި ނުވާކަމަށެވެ. ޝިފާން ވިދާޅުވީ ސަރުކާރުން ވަނީ ވެލްފެއާ ނިޒާމު ހަރުދަނާކޮށް އިސްރާފް ނުވާނޭފަދަ ގޮތަކަށް އެ ހިދުމަތް ފަރުމާކުރުމަށް ކަމަށެވެ. މިގޮތުން ފުލުހުންނަށް ދެމުންދާ އިނާޔަތެއް ކަނޑާލުމަށް ނިންމާފައި ނުވާކަމަށް ޝިފާން ވިދާޅުވިއެވެ.

Advertisement

އަންނަ އަހަރުގެ ބަޖެޓްގައި މިހާރު ކުރިއަށްދާ ސިފައިންނާއި ފުލުހުންގެ މެޑިކަލް ވެލްފެއާ ސްކީމުގެ ބަދަލުގައި މުރާޖައާކުރެވިގެން، ޕްރައިވެޓް އިންޝުއަރެންސް ނިޒާމަކަށް ބަދަލުކުރަން ސަރުކާރުން ވަނީ ނިންމާފައެވެ. 

ސަރުކާރުން ވަނީ އެ ސްކީމުގެ ބަދަލުގައި ފުލުހުންނާއި ސިފައިން، އަދި އެމީހުންގެ އާއިލާތަކަށް އެއް ހަމަަކޮށް ޕްރައިވެޓް އިންޝުއަރެންސް ހަމަޖައްސައި، އިންޝުއަރެންސް ހަމަޖެއްސުމަށް ހަރަދުކުރެވޭނެ ވަކި ލިމިޓެއް ކަނޑައެޅުމަށް ނިންމާފައެވެ.

އެހެންނަމަވެސް، ޕްރައިވެޓް އިންޝުއަރެންސްގެ ލިމިޓް ހަމަވުމަށްފަހު އާސަންދަ ނިޒާމުގެ ތެރެއިން ސިއްހީ ފަރުވާ ލިބޭނެ ކަމަށް ސަރުކާރުން ބުނެއެވެ.

ވަޒީފާ އަދާކުރުމުގެ ތެރެއިން ލިބޭ ހުރިހާ ގެއްލުމަކަށް ދައުލަތުން ފުރިހަމައަށް ހަރަދުކުރާނެކަމަށާއި، މި ބަދަލު އަންނަ އަހަރުގެ ކުރީކޮޅު ގެނައުމަށް މަސައްކަތް ކުރަމުންދާކަމަށް ސަރުކާރުން ބުނެއެވެ.