2025 ވަނަ އަހަރުގެ ބަޖެޓުގައި، އުމުރުން ދުވަސްވީ މީހުންގެ ޕެންޝަން ފައިސާއަށް ދޭން ކަނޑައަޅާފައިވާ މިންވަރު މަދު ކުރުމުން ކެންދޫ ދަާއިރާގެ މެންބަރު މައުރޫފް ޒާކިރު އެކަމަށް ފާޑުވިދާޅުވެއްޖެއެވެ. 

އަންނަ އަހަރަށް ލަފާކުރާ ބަޖެޓުގައިވާ ގޮތުން އެ ބަޖެޓުގައި، ދެމެހެއްޓެނިވި ގޮތުގައި ޕެންޝަން ނިޒާމު ކުރިއަށް ގެންދިއުމަށް ގިނަ އިސްލާހީ ފިޔަވަޅުތައް އެޅުމަށް ވަނީ ނިންމާފައެވެ. 

އެގޮތުން، 65 އަހަރުން މަތީގެ މީހުންނަށް ދޭ ބޭސިކް ޕެންޝަން އިނާޔަތް ވެސް ފޯރުންތެރި ކަމަށް ބަލައިގެން އެންމެ މަދުން އާމްދަނީ ލިބޭ ފަރާތްތަކަށް ދޭ ގޮތަށް އަންނަ އަހަރުގެ އޭޕްރީލް މަހުން ފެށިގެން ބަދަލުތަކެއް ގެންނާނެ ކަމަށް ބަޖެޓުގައި ބުނެފައިވެ އެވެ.

އެ ބަދަލުތަކާއެކު، ޕެންޝަންގެ އިނާޔަތް ބަދަލުވާނީ ޓާގެޓް ޕެންޝަން ނިޒާމަކަށް ކަމަށް އެ ބަޖެޓުގައި ބުންޏެވެ.

މަޖިލީހުގެ މިއަދުގެ ޖަލްސާގައި 2025 ވަނަ އަހަރަށް ސަރުކާރުން ހުށަހަޅާފައިވާ ދައުލަތުގެ ބަޖެޓަށް ބަހުސް ކުރައްވަމުން މައުރޫފް ވަނީ އެފަދައިން ކަން ކުރަންވީ ސަބަބާމެދު ސުވާލު އުފައްދަވާފައެވެ.

މީގެ އިތުރުން، މައުރޫފް ވަނީ، ބަޖެޓް ހަދާފައިވަނީ މަޖިލީހުގެ މަދު މެންބަރުން ކޮޅެއް ބޭނުންވާ ގޮތަށް، އެ މެންބަރުންގެ ދާއިރާއަށް އެކަނި ފައިދާވާ ގޮތަށް ކަމަށް ތުހުމަތު ކުރައްވާފައެވެ. 

އަދި 2025 ވަނަ އަހަރަށް ލަފާކުރާ ބަޖެޓްގައި ކެންދޫ ދާއިރާގެ ރަށްތަކަށް އެއްވެސް ޕްރޮޖެކްޓެއް ބަޖެޓްގައި ހިމަނާފައި ނުވާކަން ފާހަގަކުރައްވައި އެއީ ރާއްޖޭގައި ފުރަތަމަ ފަހަރަށް މެންބަރުގެ ސިޔާސީ ފިކުރަށް ބަލައިގެން ތައްޔާރު ކުރެވިފައިވާ ބަޖެޓް ކަމަށް ތުހުމަތު ކުރައްވާފައެވެ. 

އަދި އެފަދައިން، ކަން ނުކުރައްވައި، ކެންދޫ ދާއިރާގެ ރަށްތަކުގެ ތަރއްގީއަށް، ބޭނުންވެފައިވާ ކަންކަން ބަޖެޓުގައި ހިމަނައި ދެއްވުމަށް އޭނާ ވަނީ އެދިވަޑައިގެންފައެވެ. 

ހަމަ އެހެންމެ، 2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓްކަމަށް ސަރުކާރުން ބުނި ނަމަވެސް، އެ ބަޖެޓްގައި ގެދޮރުވެރިކަމަށް އޮތީ އެންމެ 15 އިންސައްތަ ކަމަށް އޭނާ ވިދާޅުވިއެވެ.