ހިޔާ ޓަވަރުގައި މިމަހުގެ 12 ވަނަ ދުވަހު މީހަކު ހައްޔަރުކޮށް އިނގިލި ބުރިކޮށްލަން އުޅުނީ މަސްތުވާތަކެތީގެ މުއާމަލާތާ ގުޅޭ މައްސަލައެއްގައި ކަމަށް ފުލުހުން ބުނެފިއެވެ.

ފުލުހުން ތަހުގީގުކުރަމުންދާ މައްސަލަތަކާ ބެހޭގޮތުން މިއަދު ނޫސްވެރިންނަށް މައުލޫމާތު ހިއްސާކުރަމުން، އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ، ހިޔާ ޓަވަރުގައި މީހަކު ރަހީނުކޮށްފައިވަނީ، މަސްތުވާތަކެތީގެ ވިޔަފާރީގެ މައްސަލައަކާ ގުޅޭގޮތުން އެމީހުންގެ މެދުގައި އުފެދުނު ދެބަސްވުމަކުން ކަން މިހާތަނަށް ކުރި ތަހުގީގުތަކުން އެނގިފައިވާކަމަށެވެ.

އޭނާ ވިދާޅުވީ މި މައްސަލާގައި ރަހީނުކުރި މީހާ އާއި އެތަނުގައި ތިބި އެހެން މީހުންނާ ގުޅުން އޮތްކަން ފާހަގަކުރެވިފައިވާ ކަމަށާއި، އެއީ މަސްތުވާތަކެއްޗާ ގުޅުންހުރި މުއާމަލާތްތައް ކަމަށެވެ.

ނޫސްވެރިންނަށް މައުލޫމާތު ހިއްސާކުރަމުން ފުލުހުން ވަނީ، މި މައްސަލާގއި ހައްޔަރުކުރި މީހުންގެ ތެރެއިން ލ. މާވަށަށް ނިސްބަތްވާ އުމުރުން 48 އަހަރުގެ އާދަމް ހުސައިނަކީ ފްލެޓްގެ ވެރިފަރާތް ބުނެފައެވެ. އަދި އެ މައްސަލާގައި އޭނާ ޓެސްޓްކުރުމުން މަސްތުވާތަކެއްޗަށް ވަނީ ޕޮޒިޓިވް ވެފައެވެ. 

ހުޅުމާލޭ ދެވަނަ ފިޔަވަހީގައި ހުންނަ ހިޔާ ޓަވަރު 9ގެ 20 ވަނަ ފަންގިފިލާގެ 11 ވަނަ އެޕާޓްމަންޓް ތެރޭގައި މީހަކު ރަހީނުކުރި މައްސަލާގައި ހިމެނޭ މިހުންގެ ބަންދުގެ މުއްދަތު މިމަހުގެ 9 ވަނަ ދުވަހު ޖަހާފައިވާއިރު، އޭގެ ތެރެއިން 3 މީހެއްގެ ބަންދުގެ މުއްދަތު ވަނީ 5 ދުވަހަށް ޖަހާފައެވެ.އަދި 9 މީހެއްގެ ބަންދުގެ މުއްދަތުގެ ގޮތުގައި ވަނީ 7 ދުވަސް ޖަހާފައެވެ.