އިންޑިއާގެ ނިއުދިއްލީގައި 43 ވަނަ އިންޑިއާ އިންޓަނޭޝަނަލް ޓްރޭޑް ފެއަރ ފަށައިފިއެވެ.

މިއަހަރުގެ ޓްރޭޑް ފެއަރ، މިއަދުން ފެށިގެން މިމަހުގެ 27 ވަނަ ދުވަހުގެ ނިޔަލަށް ކުރިއަށްދާނެއެވެ. ވިޔަފާރިވެރިންނަށް ޚާއްސަކޮށްފައިވަނީ މިއަދުން ފެށިގެން މިމަހުގެ 18 އަށެވެ. އަދި އެއަށްފަހު އޮންނަ ބައި ޚާއްސަކޮށްފައިވަނީ އާއްމުންނަށެވެ.

އިންޑިއާގެ މިނިވަންކަމަށް ގަރުނެއް ފުރޭ 2047 ވަނަ އަހަރު އަންނައިރު، ތަރައްގީވެފައިވާ ގައުމަކަށް ހެދުމަށް އިންޑިއާއިން ގެންގުޅޭ ތަސައްވުރަށް އަމާޒުކޮށްގެން ބާއްވާ މިފެއަރ ހުޅުވައިދެއްވީ އެގައުމުގެ ވިޔަފާރިއާއި ސިނާޢަތްތަކާއި ބެހޭ ވަޒީރު ޕިޔުޝް ގޮޔާލް އެވެ. ފެއާގައި އިންޑިއާގެ 3500 އެގްޒިބިޓަރުންގެ އިތުރުން 11 ގައުމަކުންވެސް މި ފެއަރގައި ބައިވެރިވެއެވެ.

އިންޑިއާ އިންޓަނޭޝަނަލް ޓްރޭޑް ފެއަރ

ފެއަރގައި ބައިވެރިވާ ގައުމުތަކުގެ ތެރޭގައި ވާދަވެރި ޗައިނާ، މިސްރު، އީރާން، ދެކުނު ކޮރެއާ، ތައިލެންޑް، ތުރުކީވިލާތް އަދި ޔޫއޭއީ ހިމެނެއެވެ.

ޓްރޭޑް ފެއަރގެ މުހިއްމުކަމާއި މަގްބޫލުކަމާއެކު، އަހަރަކު ދެ ފަހަރު މިފެއަރ ބޭއްވުން މުހިއްމުކަމަށް، ހުޅުވުމުގެ ރަސްމިއްޔާތުގައި ޕިޔުޝް ގޮޔާލް ވިދާޅުވިއެވެ. އަދި އިންޑިއާގެ އިތުރުން އިންޑިއާއިން ބޭރުގައިވެސް އިންޑިއާގެ އުފެއްދުންތަކާއި ހުނަރުވެރިކަން ދައްކާލަން މިފަދަ ފެއަރއެއް ބާއްވަން ޖެހޭކަމަށް އޭނާ ވިދާޅުވިއެވެ.

މިއަހަރުގެ ފެއަރ ޚާއްސަކޮށްފައިވަނީ އިންޑިއާގެ ޖަރްކާންދް ސްޓޭޓަށެވެ. އެގޮތުން އެ ސްޓޭޓްގެ ގުދުރަތީ ވަސީލަތްތަކާއި، ދަނޑުވެރިކަމުގެ އުފެއްދުންތަކާއި، ސިނާޢީ ގާބިލްކަން ދައްކާލާނެއެވެ.