އިމަޖެންސީ ހާލަތްތަކުގައި ގުޅާނެ އެއް ނަންބަރެއް ކަނޑައަޅައި، ރާއްޖޭގެ ނޭޝަނަލް އިމަޖެންސީ ކޯލް ސެންޓަރު 911 ރޭ އިފުތިތާހު ކޮށްފިއެވެ.

އިމަޖެންސީ ޚިދުމަތްތައް އެއް ނަންބަރެއްގެ ދަށުން ލިބޭނެ ގޮތް ހަމަޖެއްސެވުމަކީ ރައީސް މުއިއްޒުގެ ރިޔާސީ ވައުދެކެވެ.

މި އިފުތިތާހު ކުރި އިމަޖެންސީ ކޯލް ސެންޓަރުގެ ދަށުން، ފުލުހުން، އެމްއެންޑީއެފް، އެމްބިއުލާންސް، ކޯސްޓްގާޑު އަދި ފަޔާ އެންޑް ރެސްކިޔު ސާވިސްގެ ޚިދުމަތްތައް ލިބިގެންދާނެއެވެ.

ރޭގެ ޖަލްސާގައި ވާހަކަ ދައްކަވަމުން ދާޚިލީ ސަލާމަތާ ބެހޭ ވަޒީރު އަލީ އިހުސާން ވިދާޅުވީ ނޭޝަނަލް އިމަޖެންސީ ކޯލް ސެންޓަރުގެ ނަންބަރު 911ގެ ގޮތުގައި ރައީސް ޑރ. މުހައްމަދު މުއިއްޒު ކަނޑައެޅުއްވީ އެއީ އެންމެން ވެސް ދަންނަ ނަންބަރަކަށް ވާތީ ކަމަށެވެ. އެގޮތުން، ދުނިޔޭގެ ވަރަށް ގިނަ ގައުމުތަކެއްގައި އިމަޖެންސީ ސާވިސް ނަންބަރެއްގެ ގޮތުގައި 911 ބޭނުން ކުރާކަން ފާހަގަކުރެއްވިއެވެ.

އިހްސާން އިތުރަށް ވިދާޅުވީ، އިމަޖެންސީ ސާވިސް ސެންޓަރުން ދޭ ޚިދުމަތް އިތުރަށް ފުޅާކޮށް، މިއަށްވުރެ ފުރިހަމައަށް މި ޚިދުމަތް ދެވޭނެ ގޮތްތަކެއް ކުރިއަށް އޮތް ތަނުގައި ހޯއްދަވާނެކަމަށެވެ. 

އެގޮތުން، ކޮމިޔުނިކޭޝަން ސިސްޓަމްތައް އެޑްވާންސްކުރުމާއި، ޖީއައިއެސް މެޕް ކުރެވޭނެ ނިޒާމަކަށް ބަދަލުކޮށް، ޑިސްޕެޗް ސޮފްޓްވެއާ ރާއްޖޭގެ އެކި ކަންކޮޅުތަކުގައި ހުރި ޑިސްޕެޗް ސެންޓަރުތަކުން ވެސް އެ ހިދުމަތް ލިބޭނެ ގޮތަށް ހެދުމަށް ނިންމާފައިވާ ކަމަށް ވިދާޅުވިއެވެ.

މީގެ އިތުރުން، ރެސްޕޮންސް ޓައިމް އަވަސް ކުރުމާއި (ހާދިސާއާ ހިސާބަށް ދެވޭނެ ވަގުތު އަަވަސް ކުރުން)  ކޯލް ސެންޓަރުގައި ހިދުމަތްދޭ މުވައްޒަފުންގެ ކެޕޭސިޓީ އިތުރު ކުރުމަށް ތަމްރީނު ދިނުމާއި 911 ކޯލް ނަގާ މީހާއަށް ދޭން ޖެހޭ ޓެކްނިކަލް ޓްރެއިނިންގް ދިނުންވެސް ކުރިއަށް އޮތް ތަނުގައި ކުރިއަށްދާނެ ކަމަށް ވިދާޅުވިއެވެ.

"އަޅުގަނޑުމެން ރައްޔިތުންނަށް އަރުވާ ޔަގީންކަމަކީ، މި ޚިދުމަތުގެ ފެންވަރު ދާނީ ދުވަހެއް ދުވަހަކަށް ރަނގަޅުވަމުންކަން. މީގެ އިތުރުން ރާއްޖޭގެ އެކި ހިސާބުތަކުގައި ހުރި އެކި ޑިސްޕެޗު ސެންޓަރުތަކުން މި ޚިދުމަތް ލިބެމުން އަންނައިރު، މި ޚިދުމަތުގެ ފުރިހަމަކަން އަޅުގަނޑުމެން ޔަގީންކުރާނަން" އިހުސާން ވިދާޅުވިއެވެ.

މީގެ އިތުރުން އިހުސާން ވަނީ އާއްމުންނާ ގުޅިފައިވާ މިފަދަ މުހިންމު ހިދުމަތެއް، ނަހަމަ ގޮތުގައި ބޭނުން ނުކުރުމަށް ވެސް އިލްތިމާސް ކުރައްވައިފަ އެވެ.