ތެލާއި ކަރަންޓު ބޭނުން ނުކޮށް، ހައިޑްރޯޖަން ބޭނުންކޮށްގެން ދުއްވާ އިންޑިއާގެ ފުރަތަމަ ރޭލުގެ ޓެސްޓް ދަތުރުތައް މިއަހަރުގެ ޑިސެމްބަރު މަހު ފެށުމަށް އިންޑިއާއިން ތައްޔާރުވަމުން އެބަދެއެވެ.
ޖައްވަށް ވިހަ ގޭހުގެ ބަދަލުގައި ފެނާއި ހޫނު އެކަނި ބޭރުކުރާނެ މި ރޭލަކީ ތިމާވެއްޓާއި އެންމެ ރައްޓެހި ރޭލަށް ވެގެންދާނެއެވެ. ދުނިޔޭގެ އެންމެ ބޮޑު ރޭލު ނެޓްވޯކް އޮތް އިންޑިއާގެ ރޭލު ނިޒާމުގައި ބޭނުންކުރުމަށް މީގެ 35 ރޭލު ހޯދުމަށް އިންޑިއާގެ ރެއިލްވޭ ކުންފުނިން ވަނީ މިހާރު އޯޑަރު ދީފައެވެ. އަދި އެކަމަށް ވާން ޖެހޭ ތައްޔާރީތައްވެސް ދަނީ ވަމުންނެވެ. ރޭލެއްގެ އަގު 80 ކުރޯޑަށް އަރާކަމަށް ރޭލު ކުންފުންޏާއި ހަވާލާދީ މީޑިއާ ރިޕޯޓްތައް ބުނެއެވެ.
ހައިޑްރޯޖަން އުފެއްދުމަށް ރޭލު ނިޒާމުގައި ގިނަ އަދަދަކަށް ފެން ބޭނުންކުރަން ޖެހޭއިރު، ފެން ރައްކާކުރާނެ ނިޒާމުވެސް ދަނީ ތަރައްގީކުރަމުންނެވެ.
ފުރަތަމަ ހައިޑްރޯޖަން ރޭލު ބޭނުންކުރުމަށް ހަމަޖެހިފައިވަނީ ހަރްޔާނާގެ ޖިންގް-ސޯނީޕަތު ރޫޓުގައެވެ. އަދި އޭގެ ފަހުގައި އެހެން ސަރަހައްދުތަކަށްވެސް ހައިޑްރޯޖަން ރޭލުގެ ޚިދުމަތް ފުޅާކުރެވޭނެއެވެ.
ޑީސަލް ނުވަތަ ކަރަންޓު ބޭނުންކޮށްގެން ދުވާ ރޭލާއި އެއް ސްޕީޑެއްގައި ދުވާ މި ރޭލުތައް އެހެން ރޭލު ތަކަށްވުރެ 60 އިންސައްތަ އަޑު މަޑުވާނެއެވެ. އަދި ގަޑިއަކު 140 ކިލޯމީޓަރު ބާރު މިނުގައި ދަތުރުކުރާއިރު، ފަހަރަކު 1000 ކިލޯމީޓަރު ކަޑައްތުކުރާނެއެވެ.
Advertisement
This content is created and paid for by advertisers and does not involve Voice Journalists
