ފާއިތުވި މަހުގެ ފަހުކޮޅު އެމެރިކާގެ ޓެލެކޮމް ނިޒާމަށް ދިން ސައިބަރ ހަމަލާއަކީ ވަރަށް ފުޅާ ދާއިރާއެއްގައި ހިންގާފައިވާ ސީރިއަސް ޖާސޫސީ އޮޕަރޭޝަނެއް ކަމަށް ބެލެވޭކަމަށް އެފްބީއައި އާއި ސައިބަރ ސެކިއުރިޓީ އެންޑް އިންފްރާސްޓްރަކްޗަރ ސެކިއުރިޓީ އޭޖެންސީ (ސީސާ) އިން ބުނެފިއެވެ.

ވޮއިސް އޮފް އެމެރިކާއިން ރިޕޯޓުކޮށްފައިވާ ގޮތުގައި، އެނަލިސްޓުން މިހާރު ގަބޫލުކުރާ ގޮތުގައި އެމެރިކާގެ ޓެލެކޮމިއުނިކޭޝަން ނިޒާމުތަކަށް ދިން މި ސައިބަރ ހަމަލާއަކީ، ފުރަތަމަ ހީކުރެވުނު ގޮތާ ޚިލާފަށް، އެމެރިކާގެ ރިޔާސީ ކެމްޕޭންތަކަށް އަމާޒުކޮށްގެން ދިން ހަމަލާއެއް ނޫނެވެ. މިއީ ޗައިނާއިން އެމެރިކާގެ މައްޗަށް ފުޅާ ދާއިރާއެއްގައި ޖާސޫސީ ހިންގުމަށް ކުރާ މަސައްކަތުގެ ބައެއް ކަމަށް ބެލެވެއެވެ.

މި ދެ އޭޖެންސީން ނެރުނު ބަޔާނެއްގައި ވިދާޅުވެފައިވަނީ އެމެރިކާގެ އެކި ޓެލެކޮމިއުނިކޭޝަން ކުންފުނިތަކުގެ ނެޓްވޯކްތަކަށް ޗައިނާއާ ގުޅުންހުރި ހެކަރުން ވަދެ، ގިނަ އަދަދެއްގެ މުހިންމު މަޢުލޫމާތުތަކަށް ވާސިލުވެފައިވާ ކަމަށް ތަޙުޤީޤުން ހާމަވެފައިވާ ކަމަށެވެ. މީގެ އިތުރުން، އެމެރިކާގެ ޤާނޫނު ތަންފީޒުކުރާ އިދާރާތަކުން ކޯޓު އަމުރުގެ ދަށުން އެދިފައިވާ މަޢުލޫމާތުތައްވެސް މި ހެކަރުން ކޮޕީކޮށްފައިވާ ކަމަށް ބެލެވެއެވެ.

އެމެރިކާއަށް ސައިބަރ ހަމަލާއެއް އައިކަން އެމެރިކާގެ ސަރުކާރުން ހާމަކުރީ އެމެރިކާގެ ރިޔާސީ އިންތިޚާބުގެ ދެ ހަފްތާއެއްހާ ދުވަސްކުރިންނެވެ.