އަންނަ އަހަރުގެ ބަޖެޓުގައި ހިމަނާފައިވާ މަޝްރޫއުތައް ހިންގުމުގައި އެއްވެސް ރަށެއް އަދި ސިޓީއެއްވެސް ބާކީނުވާނެކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
މާލީ ވަޒީރު މިފަދައިން ވިދާޅުވީ، މިއަދު ރައްޔިތުންގެ މަޖިލީހުގައި މެންބަރުންގެ ސުވާލުތަކަށް ޖަވާބު ދެއްވަމުންނެވެ.
މިގޮތުން ވަޒީރު ޒަމީރު ވިދާޅުވީ، ޕީއެސްއައިޕީ ޕްރޮޖެކްޓް ލިސްޓުގައި ކުޑަ އަދަދެއް ޖެހުމުން އެ މަސައްކަތް ކުރިއަށް ނުދާކަން ފާހަގަވާކަމަށާއި، ބަޖެޓުގައި މަޝްރޫއު ހިންގުމަށް ފައިސާ ނެތިގެން ނުވަތަ ސަރުކާރުގެ ކޭޝް ފްލޯގައި މަޝްރޫއުތައް ހިންގޭނެ ފައިސާ ނެތިގެން މަޝްރޫއުތައް މަޑުޖެހޭކަންވެސް ފާހަގަވާކަމަށެވެ.
މިގޮތުން އެމްޓީސީސީއަށް މީގެކުރިން ހަވާލުކުރެވިފައިވާ ޕްރޮޖެކްޓްތައް ފާހަގަކުރައްވަމުން ވަޒީރު ޒަމީރު ވިދާޅުވީ، ފައިނޭންސް ކުރެވޭނެ ގޮތެއް ނެތި އެމްޓީސީސީގެ ޕައިޕްލައިންގައި ވެސް ގާތްގަނޑަކަށް 18 ބިލިއަން ރުފިޔާ ހުރިކަމަށެވެ.
"އަޅުގަނޑުމެން ދޭން އޮތް ޔަގީންކަމަކީ މިހާރު އަޅުގަނޑުމެން ގެންގުޅޭ ލިސްޓުގައިވެސް އެއްވެސް ރަށެއް އުނިވެފައެއް ނޯންނާނޭ. މި އަހަރު ތެރޭގައިވެސް ރާއްޖޭގެ ހުރިހާ ރަށެއްްގައި ސިޓީތަކާއި މާލެވެސް ހިމެނޭ ގޮތަށް މަޝްރޫއުތައް ފަށަން އޮތީ ޕްރޮގުރާމުގައި ރޭވިފައި،"
ވަޒީރު ޒަމީރު ވިދާޅުވިއެވެ.
ވަޒީރު ވިދާޅުވީ، ޕްރޮޖެކްޓްތަކަށް ބޭނުންވާ ފަންޑު ކަނޑައަޅައި، ރައީސް ޑރ.މުޢިއްޒަށް ހުށަހަޅުއްވާފައިވާ ކަމަށާއި އަދި ޕްރޮޖެކްޓްތައް ކުރިއަށް ގެންދާނީ އެމަނިކުފާނު ކަނޑައަޅާފައިވާ އިސްކަންދޭ ތަރުތީބުން ކަމަށާއި، ޕްރޮޖެކްޓްތަކުގެ ތަފްސީލުތައް ބަޖެޓުން ޖާގަ ލިބޭ މިންވަރަކުން އިއުލާނު ކުރަމުން ދާނެ ކަމަށެވެ.
މިއާއިއެކު، އެއްވެސް ރަށެއް އުނިވެފައެއް ނޯންނާނެ ކަމަށާއި، މި އަހަރު ތެރޭގައިވެސް ރާއްޖޭގެ ހުރިހާ ރަށަކާއި ސިޓީތަކާއި މާލެވެސް ހިމެނޭ ގޮތަށް މަޝްރޫއުތައް ފަށަން ރާވާފައިވާކަމުގެ ޔަގީންކަން ވަޒީރު ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
