އިންޑިއާއާއި ޕާކިސްތާނު ގުޅޭ ކަނޑުގެ ސަރަހައްދީ އިމުގެ ކައިރިން ޕާކިސްތާނުން ހައްޔަރުކުރި އިންޑިއާ މަސްވެރިން ޕާކިސްތާނަށް ގެންދަނިކޮށް އިންޑިއާ ކޯސްޓް ގާޑުން ސަލާމަތްކޮށްފިއެވެ.
އިންޑިއާގެ ކޯސްޓްގާޑުން ބުނާ ގޮތުގައި ޕާކިސްތާނުގެ މެރިޓައިމް ސެކިއުރިޓީ އެޖެންސީއިން އިންޑިއާގެ 7 މަސްވެރިން ހައްޔަރުކޮށްފައިވަނީ އިންޑިއާގެ ކަނޑުގެ ސަރަހައްދުންނެވެ. އަދި އެމީހުން ސަލާމަތްކުރީ އިންޑިއާގެ ކޯސްޓްގާޑުން ޕާކިސްތާނުގެ އުޅަނދު ފަހަތުން 2 ގަޑިއިރު ދުއްވުމަށްފަހު ކަމަށްވެސް އިންޑިއާއިން ބުނެއެވެ.
މިހާދިސާގައި ސަލާމަތްކުރި ހުރިހާ މަސްވެރިންގެ ހާލުވެސް ރަނގަޅެވެ. އެހެންނަމަވެސް އެމީހުން ދަތުރުކުރި މަސް ބޯޓު، ޕާކިސްތާނު މެރިޓައިމް ސެކިއުރިޓީގެ އޮފިސަރުންގެ އަމަލުތަކުގެ ސަބަބުން ގެއްލުންލިބި ފެތުނީކަމަށް އިންޑިއާ ކޯސްޓްގާޑުން ބުނެއެވެ.
މިމައްސަލަ އިންޑިއާގެ ކޯސްޓްގާޑާއި ޖާސޫސީ އިދާރާތަކާއި މަސްވެރިކަމާއި ބެހޭ އިދާރާތައް ގުޅިގެން ދަނީ ތަހުގީގުކުރަމުންނެވެ. ޚާއްސަކޮށް ޕާކިސްތާނު އޮފިޝަލުން އިންޑިއާ މަސްވެރިން ހައްޔަރުކުރަން ޖެހުނު ސަބަބެއް ދަނީ ބަލަމުންނެވެ.
Advertisement
This content is created and paid for by advertisers and does not involve Voice Journalists
