ރައްޔިތުން މަޖިލީހުގެ ރުހުމަކާނުލައި، ރާއްޖޭގައި ބޭރު ސިފައިން ނުތިބެވޭގޮތަށް ގާނޫނު އަސާސީއަށް އިސްލާހެއް ހުށަހަޅަން ސަރުކާރުން ނިންމައިފިއެވެ.
ވޮއިސްއަށް މައުލޫމާތު ލިބިފައިވާ ގޮތުގައި މަޖިލީހުގެ މާދަމާގެ ޖަލްސާއަށް ސަރުކާރުގެ ފަރާތުން މި އިސްލާހު ހުށަހެޅުމަށް ވަނީ ތާވަލްކޮށްފައެވެ.
ގާނޫނު އަސާސީގައި މިހާރު ބަޔާންކޮށްފައިވާގޮތުން ބޭރުގެ ސިފައިން ރާއްޖޭގައި ގާއިމްވެ ތިބުމަށް މަޖިލީހުގެ ރުހުމެއް ބޭނުމެއް ނުވެއެވެ. ނަމަވެސް ރާއްޖޭގެ އެއްވެސް ސަރަހައްދެއްގައި އަސްކަރީ މަރުކަޒެއް ގާއިމްކުރާނަމަ މަޖިލީހުގެ ރުހުން އޮންނަން ޖެހެއެވެ.
ރާއްޖޭގައު ބޭރުގެ ސިފައިން ތިބުމަށް މަޖިލީހގެ ރުހުން ހޯދަން ޖެހޭގޮތަށް ގާނޫނު އަސާސީ އިސްލާހުކުރުމުގެ މަސައްކަތް ސަރުކާރުން ފެށުމަށް ތައްޔާރުވަމުންދާއިރު، ކުރީގެ ރައީސް ޔާމީނު އެންމެފަހުން މިއަދުވެސް ވިދާޅުވެފައިވަނީ، އިންޑިއާގެ ސިފައިން ރާއްޖޭގައި ގާއިމްވެ ތިބި ކަމަށެވެ. ނަމަވެސް ރައީސް ޑރ.މުހައްމަދު މުއިއްޒު ވިދާޅުވެފައިވަނީ، ރާއްޖޭގައި ތިބި ބޭރުގެ ސިފައިން އެނބުރި އެމީހުންގެ ގައުމަށް ފޮނުވާލާފައިވާކަމަށެވެ.
މިދިޔަ އަހަރުތަކުގައި ރާއްޖޭގައި އިންޑިއާ ސިފައިން ގާއިމްވެ ތިބީ، އިންޑިއާއިން ރާއްޖެއަށް ހަދިޔާކުރި ހެލިކޮޕްޓަރާއި، ޑޯނިއާ މަތިންދާބޯޓް އޮޕަރޭޓް ކުރުމަށެވެ. ރާއްޖޭގައި ތިބި އިންޑިއާ ސިފައިން އެނބުރި ގައުމަށް ފޮނުވާލުމަކީ މި ސަރުކާރުގެ ވައުދެކެވެ. ސަރުކާރުން ވަނީ ދެ ފިޔަވައްސަކަށް ބަހާލައިގެން އިންޑިއާ ސިފައިން އަނބުރާ ފޮނުވާލާފައެވެ.
Advertisement
This content is created and paid for by advertisers and does not involve Voice Journalists
