ގާނޫނުއަސާސީގެ މުހިންމު މާއްދާތަކަށް އިސްލާހު ގެންނަން ރައްޔިތުންގެ ހިޔާލު ހޯދުމުގެ ވޯޓަކަށް ދާން ޖެހޭ ކަމަށް ބުނާ މާއްދާ އިސްލާހު ކުރަން ރައްޔިތުންގެ ހިޔާލު ހޯދަން ޖެހޭ ގޮތަށް ގާނޫނުއަސާސީ އިސްލާހު ކުރަން ހުށަހަޅައިފި އެވެ.

ސަރުކާރުގެ ފަރާތުން މި ބިލު، ހުށަހެޅުއްވީ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) އެވެ. 

މި ބިލު ހުށަހެޅުމުގެ މައިގަނޑު މަޤްޞަދުގެ، ގޮތުގައި ފާހަގަކޮށްފައިވަނީ،  ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އަންނަނިވި އިޞްލާޙުތައް ގެނައުމެވެ:

Advertisement

1. ދިވެހިރާއްޖޭގެ ކަނޑުގެ ސަރަޙައްދަށް އެއްވެސް ބަދަލެއް ގެނައުމަށް ނުވަތަ އެއިން ސަރަޙައްދަކަށް އުނިކަމެއް އަތުވެދާނެ ފަދަ އެއްވެސް ކަމެއް ކުރެވޭނީ، ރައްޔިތުންގެ މަޖިލީހުގެ ޖުމްލަ މެންބަރުންގެ ތިންބައިކުޅަ ދެބައިގެ އަޣުލަބިއްޔަތުން ފާސްކުރާ ޤާނޫނަކުން އެކަނި ކަމުގައި ކަނޑައެޅުން.

2. ދިވެހިރާއްޖޭގެ ސަރަޙައްދު އަސްކަރީ ބޭނުމަށް ބޭރުގެ ސިފައިންނަށް ބޭނުންކުރުމުގެ ހުއްދަ ދެވޭނީ ހަމައެކަނި ރައްޔިތުންގެ މަޖިލީހުން ފާސްކޮށްގެން ކަމުގައި ކަނޑައެޅުން.

3. ރައްޔިތުންގެ މަޖިލީހުގެ މެންބަރުން އިންތިޚާބުވި ހައިސިއްޔަތު ބަދަލުވުމަކީ މެންބަރުކަން ގެއްލޭނެ ޙާލަތެއް ކަމުގައި ކަނޑައެޅުމަށް ގެންނަންޖެހޭ އިޞްލާޙުތައް ގެނައުން.

މީގެ އިތުރުން، ގާނޫނުގެއަސާސީގެ 262 ވަނަ މާއްދާގެ (ށ)، އިސްލާހު ކުރުމަށް ރައްޔިތުންގެ ހިޔާލު ހޯދަން ޖެހޭ ގޮތަށް އިސްލާހް ކުރުމަށް ވެސް ހުށަހަޅާފައިވެއެވެ.

އެ މާއްދާގައިވާ ގޮތުން މައިގަނޑު ތިން ކަމަކަށް އިސްލާހު ގެނައުމަށް ރައްޔިތުންގެ މަޖިލީހުން ފާސް ކުރާ އެއްވެސް ބިލެއް ރައީސް ތަސްދީގު ކުރައްވަން ވާނީ އެ އިސްލާހެއް ގެނައުމަށް ރައްޔިތުން ރުހޭތޯ ބެލުމަށް ނަގާ ހިޔާލު ހޯދުމުގެ އާންމު ވޯޓުން އެ ކަމަށް އަގުލަބިއްޔަތު ލިބިއްޖެ ނަމަ އެވެ. އެ ތިން ކަމަކީ:

1- ގާނޫނުއަސާސީގެ އަސާސީ ހައްގުތަކާއި މިނިވަންކަން ހިމެނޭ ބާބުގެ އެއްވެސް މާއްދާއެއް 

2- ރައްޔިތުންގެ މަޖިލީހުގެ އުމުރު

3- ރިޔާސީ ދައުރާއި ރައީސް އިންތިހާބު ކުރާ ގޮތް

އެހެން ނަމަވެސް، މިހާރު އޮތް ގޮތުން، މަޖިލީހުން ބެނުންވާ ނަމަ، 262 (ށ)ގެ ބާރު ކެނޑޭ ގޮތަށް އެ މާއްދާއަށް އިސްލާހެއް ގެނެސް، އެ ކަންކަމަށް ރައްޔިތުންގެ ހިޔާލު ހޯދަން ނުޖެހޭ ގޮތަށް ހެދުމުގެ ފުރުސަތު މަޖިލީހަށް އޮންނާނެ އެވެ.

ޝާހިދުގެ އިސްލާހާއެކު ރައްޔިތުންގެ ރުހުން ނެތި މަޖިލީހަށް އެފަދައިން އިސްލާހެއް ނުގެނެވޭނެ އެވެ.