ރައްޔިތުންގެ މަޖިލީހަށް މިހާރު ހުށަހަޅާފައިވާ މަޖިލީހުގެ މެންބަރުން ޕާޓީ ބަދަލުކުރުމުން ގޮނޑިގެއްލޭގޮތަށް ޤާނޫނުއަސާސީއަށް ހުށަހަޅުއްވާފައިވާ އިސްލާހު ކޮމިޓީން ފާސްކޮށްފިއެވެ.

މި އިސްލާހް މަޖިލީހުން ފާސްކުރީ 75 މެމްބަރުންގެ ވޯޓުންނެވެ. ނުފެންނަކަމަށް 13 މެމްބަރަކު ވަނީ ވޯޓު ދީފައެވެ.

ސަރުކާރުގެ ފަރާތުން މި ބިލު، ހުށަހެޅުއްވީ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) އެވެ. 

ޝާޑު ހުށަހެޅުއްވި މި އިސްލާހުގައިވާގޮތުން، ރައްޔިތުންގެ މަޖިލީހަށް ހޮވިފައިވާ މެންބަރަކަށް އަންނަނިވި ޙާލަތުން ކުރެ ޙާލަތެއް މެދުވެރިވެއްޖެނަމަ އެ މީހަކު ރައްޔތުންގެ މަޖިލީހުގެ މެންބަރުކަމުން ވަކިވާނެއެވެ.

1. ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިޚާބު ވުމަށްފަހު، އެ ރައްޔިތުންގެ މަޖިލިހުގެ ޢުމުރުގެ ތެރޭގައި އެ މެންބަރަކު ތަމްސީލުކުރާ ސިޔާސީ ޕާޓީން އަމިއްލައަށް ވަކިވުން

2. ސިޔާސީ ޕާޓީގެ ގާނޫނުގައި ބަޔާންކުރާ ގޮތުގެމަތިން، މެންބަރު ނިސްބަތްވާ ޕާޓީން އޭނާ ވަކިކުރުން

3. އެ މެންބަރަކު ތަމްސީލުކުރާ ސިޔާސީ ޕާޓީ ނޫން އެހެން ޕާޓީއެއްގެ މެންބަރަކަށްވުން.

4. އަމިއްލަ ގޮތުން ވާދަކޮށްގެން ރައްޔިތުންގެ މަޖިލީހަށް އިންތިޚާބުވުމަށްފަހު، ސިޔާސީ ޕާޓީއެއްގެ މެންބަރަކަށް ވުން

ޕާޓީ ބަދަލު ކުރުމުން ގޮނޑި ގެއްލޭ ގޮތަށް އެންޓިޑުފެކްޝަން ގާނޫނެއް އެކުލަވާ ލެވުނީ، ނިމިދިޔަ އެމްޑީޕީ މެޖޯރިޓީ އޮތް މަޖިލީހުންނެވެ. 

މުޅި މަޖިލީހުގެ ކޮމިޓީން ފާސްކުރި އިސްލާހުތަކުގެ ތެރޭގައި މަޖިލީހުގެ މެންބަރުން ޕާޓީ ބަދަލުކުރުމުން ގޮނޑިގެއްލޭގޮތަށް ޤާނޫނުއަސާސީއަށް ސަރުކާރުން ގެނައުމަށް ނިންމާފައިވާ އިސްލާހުގެ އިތުރުން ބޭރު ސިފައިން ރާއްޖޭގައި ގާއިމްވެ ތިބެވޭނީ މަޖިލީހުން ފާސްކޮށްގެންކަމަށް ސަރުކާރުން ހުށަހެޅި އިސްލާހު ހިމެނެއެވެ. 

ކޮމިޓީން ފާސްކުރި އިސްލާހުތައް މަޖިލީހުގެ ތަޅުމުން ފާސްކުރުމަށް މިއަދު ހަވީރު 17:30 ގައި ވަނީ މަޖިލީހުގެ ޖަލްސާއެއް ބޭއްވުމަށް ތާވަލްކޮށްފައެވެ.