އެންޓި ކޮރަޕްޝަން ކޮމިޝަނާއި، އިލެކްޝަން ކޮމިޝަނުގެ ނައިބުރައީސް ހިމެނޭހެން، އިތުރު 3 މެމްބަރަކު ވަކިކުރަން މިނިވަން މުއައްސަސާތަކާ ބެހޭ ކޮމިޓީން ފާސްކޮށްފިއެވެ.
މިއަދު ބޭއްވި އެ ކޮމިޓީގެ ބައްދަލުވުމުގައި ވަކިކުރަން ފާސްކުރި މެމްބަރުންގެ ތެރޭގައި، އޭސީސީގެ ނައިބުރައީސް އަބްދުއްސަލާމާއި، އީސީގެ ނައިބުރައީސް އަލީ ނަޝާތުގެ އިތުރުން ޑރ.މުހައްމަދު ޒާހިރު އާއި، މުހައްމަދު އާސިފް ހިމެނެއެވެ. ސިއްރުކޮށްގެން ކުރިއަށްގެންދިޔަ ކޮމިޓީގެ ބައްދަލުވުމުގައި ސިވިލްސާވިސް ކޮމިޝަނުގެ ރައީސް މުހައްމަދު ނާސިހު ފިޔަވައި ކޮމިޓީން ވަނީ އެހެން އެންމެން ވަކިކުރުމަށް ފާސްކޮށްފައެވެ.
އެންޓި ކޮރަޕްޝަން ކޮމިޝަނާއި، އިލެކްޝަން ކޮމިޝަނުގެ އިތުރުން ސިވިލް ސާވިސް ކޮމިޝަނުގައި ހިމެނޭ ބައެއް ވެރިން ވަކިކުރުމަށް ރައްޔިތުންގެ މަޖިލީހަށް ހުށަހެޅީ ނޮވެމްބަރުމަހުގެ 11 ވަނަ ދުވަހުއެވެ. އެ މެމްބަރުން ވަކިކުރުމަށް ހުށަހެޅީ މަގާމުގެ ޒިންމާ އަދާނުކުރާތީއެވެ.
މިނިވަން މުއައްސަސާތަކުގެ ތެރެއިން އެންޓި ކޮރަޕްޝަން ކޮމިޝަނާއި، އިލެކްޝަން ކޮމިޝަނުގެ ރައީސް އައްޔަނުކުރުމުގެ ބާރު ރައީސުލްޖުމްހޫރިއްޔާއަށް ލިބިދޭގޮތަށް ވަނީ ބިލެއް ފާސްކުރުމަށް މަޖިލީހަށް ހުށަހަޅާފައެވެ. އެ ބިލުގެ މަސައްކަތް މިހާރު އޮތީ ކޮމިޓީ މަރުހަލާގައެވެ.
Advertisement
This content is created and paid for by advertisers and does not involve Voice Journalists
