ނޭޝަނަލް އިންޓެގްރިޓީ ކޮމިޝަން (އެންއައިސީ)ގެ މެންބަރުކަމަށް ގ. ނޫރަންފިނި، އަލްއުސްތާޛާ މަރިޔަމް އިންޝާ ފައިސަލް ނަން، ރައީސް ޑރ. މުހައްމަދު މުއިއްޒު މިއަދު ހުށަހަޅުއްވައިފިއެވެ.

ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވި ސިޓީ މަޖިލީހުގެ މިއަދުގެ ޖަލްސާގައި އިއްވާފައިވާއިރު، އެ ސިޓީގައިވަނީ އެންއައިސީގެ މެންބަރު ކަމަށް ކުރިމަތިލުމަށް އިއުލާނުކުރުމުން އެކަމަށް އިޖާބަ ދެއްވި ބޭފުޅުންގެ ތެރެއިން އިންޝާ އެ މަގާމަށް އައްޔަންކުރުމަށް ހުށަހަޅުއްވާފަ އެވެ.

މި މައްސަލަ ދިރާސާކުރަން މަޖިލީހުގެ މިނިވަން މުއައްސަސާތަކުގެ ކޮމިޓީއަށް ވަނީ ފޮނުވާފަ އެވެ.

Advertisement

އިންޝާ ވަނީ މީގެ ކުރިން އެ ކޮމިޝަންގެ ސީނިއާ އިންވެސްޓިގޭޓަރެއްގެ މަގާމު ވެސް އަދާކުރައްވާފައެވެ.

އެންއައިސީގައި މިހާރު ތިއްބަވަނީ:

އެންއައިސީގެ ރައީސް ގާސިމް އަބްދުލްކަރީމް

އެންއައިސީގެ ނައިބު ރައީސާ އަލްއުސްތާޛާ އާޝިޔަތު ޝިއުނާ

އެންއައިސީގެ މެންބަރު އާމިނަތު ޝާދިޔާ

އަލްއުސްތާޛު ޝުއައިބު އަބްދުއްރަހްމާން

2015 ވަނަ އަހަރު އުފެދުނު އެންއައިސީއަކީ ކަސްޓްމްސް އާއި ފުލުހުންނާއި ކަރެކްޝަންސްގެ އިތުރުން އިމިގްރޭޝަންގެ މުވައްޒަފުން ކުރާ ގާނޫނާއި ގަވާއިދާ ހިލާފު އަމަލުތައް ތަހުގީގު ކުރުމަށާއި އެފަދަ ކަމަކަށް ތުހުމަތުކުރެވި މައްސަލައެއް ހުށަހަޅައިފިނަމަ އެ ކަން ތަހުގީގު ކުރަން އުފައްދާފައިވާ ކޮމިޝަނެކެވެ.