ފޭރުމުގެ މައްސަލައެއްގައި ހިމެނޭ ތިން މީހުންގެ މައްޗަށް 9 މަހުގެ ޖަލު ހުކުމެއް އިއްވައިފި އެވެ.

މި މައްސަލައިގައި ކްރިމިނަލް ކޯޓުން ހުކުމްކޮށްފައިވަނީ މއ. މަސްފަން، ޢާއިޝަތު (43އ) އާއި މއ. މަސްފަން، މުޙައްމަދު ރީހާން (27އ) އަދި ސ. ހިތަދޫ / ސޯމާ، ޝަފީޤު އިބްރާހީމް (35އ) ގެ މައްޗަށެވެ.

މި ތިން މީހުންނަކީ 2024 ޖުލައި 24 ވަނަ ދުވަހުގެ ވަގުތެއްގައި، މއ. މަސްފަން ގެއަށް ދިވެހި ފިރިހެނަކު ވައްދައި، އެމީހާއަށް ވަޅިން ބިރުދައްކައި ބަރަހާނަކޮށް، އަނިޔާކޮށް، އޭނާގެ މޯބައިލް ފޯނުއަތުލައި އޭނާގެ ބެންކު އެކައުންޓުން ފައިސާ ޓްރާންސްފަރކުރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމްއިން ފައިސާ ނަގާފައިވާ ކަމަށް ތުހުމަތުކުރެވޭ މައްސަލައިގައި ހިމެނޭ ތިން މީހުންނެވެ.

Advertisement

މި މައްސަލައިގައި ތިން މީހުންގެ މައްޗަށް ވެސް ވަނީ ތިން ދައުވާއެއް ކޮށްފައިވައެވެ.

އެތިން ދައުވާގެ ތެރެއިން އަނިޔާއެއް ދިނުމުގެ ކުށުގެ ދައުވާ ސާބިތުވެ 18 ދުވަހަށް ތިން މީހުން ޖަލަށް ލުމަށާއި، އެނގިހުރެ ހުއްދަނޫން ގޮތުގައި މައުލޫމާތު ހޯދުމުގެ ކުށުގެ ދައުވާ ސާބިތުވެ، 4 މަހާއި 24 ދުވަހަށް ޖަލަށްލުމަށް ވަނީ ހުކުމްކޮށްފައެވެ.

ބަންދުގައި ހުރި މުއްދަތު ހުކުމުގެ މުއްދަތުން ކެނޑުމަށްފަހު، މި މައްސަލައިގައި ޝާމިލުވާ ޢާއިޝަތު ތަންފީޒުކުރަންޖެހޭ ޖަލު ހުކުމަކީ 5 މަހާއި 24 ދުވަސްކަމަށާއި، މުޙައްމަދު ރީޙާން ތަންފީޒުކުރަންޖެހޭ ޖަލު އަދަބުގެ މުއްދަތަކީ 5 މަހާއި 23 ދުވަސް އަދި ޝަފީޤު އިބްރާހިމް ތަންފީޒު ކުރަންޖެހޭ ޖަލު އަދަބުގެ މުއްދަތަކީ 8 މަހާއި 18 ދުވަސް ކަމަށް ކްރިމިނަލް ކޯޓުން ވަނީ ކަނޑައަޅާފައެވެ.