އިލެކްޝަން ކޮމިޝަން (އީސީ) ގެ ޑޭޓާބޭސް އިން މައުލޫމާތު ނަގައި، އެޕްލިކޭޝަން ހެދުމާއި އާއްމު ރައްޔިތުންގެ މައުލޫމާތުތައް ވިއްކުން ފަދަ ބޮޑެތި ތުހުމަތުތަކެއް ކޮށްފިއެވެ.

މި ތުހުމަތުތައް ކޮށްފައިވަނީ އީސީގެ ނައިބު ރައީސްގެ ގޮތުގައި ހުރި އަލީ ނަޝާތު އަދި އެ ކޮމިޝަންގެ މެންބަރުން ކަމަށްވާ ޑރ. މުހައްމަދު ޒާހިރާއި މުހައްމަދު އާސިފްގެ މައްޗަށެވެ.

އިއްޔެ ބޭއްވި ރައްޔިތުންގެ މަޖިލީހުގެ ކޮމެޓީގެ ސިއްރު ބައްދަލުވުމެއްގައި މި ތިން ބޭފުޅުން ވެސް މަގާމުން ވަކިކުރަން އެ ކޮމެޓީން ފާސްކޮށްފައިވާއިރު، މި ބޭފުޅުން ވަކިކުރަން މަޖިލީހުގެ ތަޅުމުގައި ނެގި ވޯޓުން ވަނީ ވަކިކުރުމަށް ފާސްކޮށްފައެވެ.

Advertisement

އެ މައްސަލަ ބެލި ކޮމެޓީގެ ރިޕޯޓުގައި އެ ތިން ބޭފުޅުންގެ މައްޗަށް ވަނީ ގިނަ ކަންތައްތަކެއް ތުހުމަތުކޮށްފައެވެ. އޭގެ ތެރޭގައި މަގާމުގެ ނުފޫޒު ބޭނުންކުރައްވައިގެން އުސޫލުން ބޭރުން ގިނަ ކަންތައްތަކެއް ވަނީ ކޮށްފައެވެ. އޭގެ ތެރޭގައި އިލެކްޝަނަށް ބޭނުންވާ އާލާތް ހޯދަން މަސްލަހަތު އޮންނަ ވަކި ކުންފުންޏެއް މެދުވެރިކޮށް ކުރުމާއި އީސީގެ ޑޭޓާބޭސް ނަހަމަގޮތުގައި ބޭނުންކޮށްގެން އައިޑީކާޑު ވިއްކާފައިވާކަމަށް ވަނީ ތުހުމަތުކޮށްފައެވެ.

މީގެ އިތުރުން އެ ބޭފުޅުން އިލެކްޝަނުގެ މުއައްޒަފުންނާ ބޭއަދަބީކޮށް މުއާމަލާތްކުރުމާއި، ވަކި މުއައްޒަފުންތަކެއް ކޮންޓްރޯލްކޮށްގެން ގެންގުޅުމުގެ އިތުރުން ސިޔާސީ ފަރާތްތަކަށް އީސީގެ ތެރެއިން އުސޫލާހިލާފަށް ކަންކަން ކޮށްދީފައިހުރިކަމަށް ވަނީ ތުހުމަތުކޮށްފައެވެ.